Root 4:1-22
4 Boawaz gaahn da di siti gayt, an ih mi sidong deh. Ahn den di man weh da di kloasis famili memba tu Elimelek mi-di paas rong deh ahn Boawaz tel ahn: “Kohn sidong ya.” Soh ih gaahn sidong wid Boawaz.
2 Den Boawaz tel ten a di oalda man weh tek di leed eena di siti: “Unu pleez kohn sidong ya wid wi.” Soh aala dehn mi sidong tugeda.
3 Den Boawaz tel di man weh da di kloasis famili memba tu Elimelek: “Nayomi kohn bak fahn Moawab ahn shee haftu sel di lan weh bilangz tu wi famili memba, Elimelek.
4 Soh Ah mi waahn mek yu noa bowt it, an Ah mi waahn tel yu fi bai it fronta aala di peepl weh liv ya ahn fronta di oalda man dehn weh di tek di leed monks wi peepl. Soh if yu waahn bai it, den goh hed bikaaz yoo da di kloasis famili memba tu Elimelek. Bot if yoo noh waahn bai it, den mek Ah noa bikaaz Ai da di wan afta yoo weh ga di rait fi bai it.” Den di man seh: “Ah wahn bai di lan.”
5 Den Boawaz tel ahn: “Ah waahn yu noa dat wen yu bai di lan, ih noh onli bilangz tu Nayomi, bot ih aalso bilangz tu Root, hoo da fahn Moawab, ahn fi shee hozban ded. Dat meenz dat if yu bai di lan, den di famili a di ded man wahn kantinyu fi oan di lan.”
6 Den di man seh: “Ai kyaahn bai di lan. If Ah du dat, Ah wahn looz wahn lat an Ah wahn geh poa. Soh Ah wahn giv op mai rait fi bai di lan ahn yoo ku bai it fi yuself.”
7 Eena dehndeh dayz, wen wan a di Izrelait dehn mi ga di rait fi bai bak sohnting er wen dehn mi waahn giv op dehn rait fi oan sohnting, dehn mi haftu tek aaf wan a dehn sandalz ahn giv it tu di ada persn weh dehn mi-di mek wahn agreement wid. Dehn mi haftu du dat fi mek tingz leegal.
8 Soh wen di man hoo da-mi di kloasis famili memba tu Elimelek mi tel Boawaz fi bai di lan fi ihself, di man tek aaf wan a ih sandalz ahn giv it tu ahn.
9 Den Boawaz tel di oalda man dehn weh mi tek di leed eena di siti an aala di peepl weh mi dehdeh: “Unu di si fi unuself dat Ai di bai evriting fahn Nayomi weh mi bilangz tu Elimelek, Kiliyon, ahn Maalon.
10 An Ah wahn aalso geh marid tu Root, hoo da fahn Moawab ahn hoo da-mi Maalon waif. Ah wahn du dis soh dat di lan ku stay eena Maalon famili ahn da way deh, ih famili ahn di peepl fahn di siti noh wahn ferget da man naym. Unu di si dis fi unuself tudeh.”
11 Den aala di oalda man weh mi tek di leed eena di siti an aala di peepl weh mi deh da di gayt a di siti mi seh: “Wi di si fi wiself evriting weh di hapm. Wi hoap dat Jehoava bles di yong laydi weh yu wahn geh marid tu soh dat shee ku bee laik Raychel ahn laik Leeya, bikaaz di nayshan a Izrel mi kohn fahn di too a dehn. Wi hoap dat evriting goh gud wid yoo ahn dat yu mek wahn gud naym fi yuself rait ya da Betlihem.
12 Wi hoap dat di famili weh Jehoava gi yu chroo dis yong laydi bee jos laik Peerez famili. Hihn da-mi Taymar ahn Jooda son.”
13 Soh Boawaz mi geh marid tu Root ahn hihn mi ga sekshwal rilayshanz wid ahn. Jehoava mi bles Root ahn shee mi geh pregnant an ih mi ga wahn son.
14 Den di laydi dehn fahn Betlihem mi tel Nayomi: “Mek Jehoava geh aala di prayz bikaaz hihn yooz Boawaz, weh da yu hozban faamli, fi tek unu owta di sichuwayshan weh unu mi deh eena.* Ahn wi hoap dat evribadi da Izrel noa bowt dis pikni!
15 Dis pikni wahn bring bak hapinis tu yu laif. Hihn wahn tek kayr a yu fi di res a yu laif, bikaaz hihn da di son a yu daata-in-laa, Root. Shee lov yu ahn shee beta dan sevn son.”
16 Nayomi mi hoal di baybi kloas tu ahn, an shee mi main ahn.
17 Di laydi dehn weh mi liv kloas tu Nayomi mi gi di baybi wahn naym, ahn dehn mi seh: “Root ga wahn son, bot da laik if dis baybi da fi Nayomi.” Soh dehn mi naym ahn Oabed. Hihn da Jesi pa, ahn Jesi da Dayvid pa.
18 Dehnya da Peerez famili membaz: Peerez da-mi Hezron pa;
19 Hezron da-mi Ram pa; Ram da-mi Aminadab pa;
20 Aminadab da-mi Nashon pa; Nashon da-mi Salmon pa;
21 Salmon da-mi Boawaz pa; Boawaz da-mi Oabed pa;
22 Oabed da-mi Jesi pa, ahn Jesi da-mi Dayvid pa.
Futnoat
^ Er “fi bai unu bak.” Si di Glasari, “Bai bak.”
