Saam 102:1-28
Dis pryaa di kohn fahn sombadi weh di sofa ahn weh feel week. Ih di tel Jehoava bowt aala ih woriz.
102 Oa Jehoava, pleez hyaa mi pryaa;Hyaa mi wen Ah di krai owt tu yu.
2 Noh haid fahn mi wen Ah di sofa.
Pleez bring yu ayz kloas ahn lisn* tu mi;Pleez hori ansa mi wen Ah kaal owt tu yu.
3 Bikaaz mi dayz di disapyaa laik smoak,Ahn mi boan dehn feel laik if dehn di bon eena wahn oavn.
4 Mi haat da laik graas weh di jrai op eena di son,Bikaaz Ah ferget fi eet.
5 Ah da loan skin ahn boanz,Bikaaz Ah di sofa soh moch dat Ah di pain weh.
6 Ah loanli laik wahn pelikan weh deh eena di wildanes,Laik wahn smaal owl weh di liv monks sohn rooinz.
7 Ah kyaahn sleep;*Ah da laik wahn berd weh di sidong pahn wahn roof aal bai ihself.
8 Aal day mi enimi dehn mak mi.
Dehn wan weh tek mi fi wahn fool yooz mi naym laik wahn kers.*
9 Da laik Ah di eet ashiz,Ahn mi tyaaz miks op wid weh Ah di jrink.
10 Dis hapm bikaaz yu beks bad wid mi.
Da laik yu pik mi op fi jos dash mi weh.
11 Mi laif da laik wahn shado weh di fayd weh,An Ah di jrai op laik graas.
12 Bot yoo egzis fareva, Oa Jehoava,An evri jenarayshan wahn noa yu naym.
13 Fi shoar yu wahn get op ahn shoa mersi tu Zaiyan;Da taim fi mek yu shoa kompashan tuwaadz it.
14 Bikaaz yu servant dehn cherish ih stoan dehn,Ahn dehn eevn cherish di dos weh dehdeh.
15 Aala di nayshan dehn wahn rispek yu naym, Oa Jehoava,An aala di king dehn pahn di ert wahn si yu gloari.
16 Bikaaz Jehoava wahn bil bak Zaiyan,An evribadi wahn si how hihn soh powaful.
17 Hihn wahn lisn weneva dehn wan weh poa pray tu ahn;Hihn noh wahn ignoar dehn pryaa.
18 Aala dehnya tingz deh eena raitin fi di fyoocha jenarayshan,Soh dat eevn dehn wan weh noh egzis yet wahn prayz Jah eena di fyoocha.
19 Jehoava luk dong fahn ih hoali plays weh deh op hai;Fahn hevn ih luk dong pahn di ert.
20 Ih luk dong soh dat ih ku hyaa how di prizna dehn di krai owt tu ahn,Ahn fi set free dehn wan weh ga wahn det sentens,
21 Soh dat evribadi eena Zaiyan wahn ku noa Jehoava naym,Ahn soh dat evribadi prayz ahn eena Jeroosalem,
22 Wen di nayshanz ahn di kingdom dehnGyada tugeda fi serv Jehoava.
23 Ih tek weh mi schrent bifoa mi taim;Ih shaatn mi laif.
24 Ah mi tel ahn: “Mi Gaad,Yoo da di wan weh liv fareva an eva;Pleez noh kot di dayz a mi laif eena haaf.
25 Fahn way bak yu mi lay dong di fongdayshan fi di ert,Ahn yu mek hevn* wid yu oan too han.
26 Hevn* an ert wahn stap egzis, bot yoo wahn egzis fareva;Dehn wahn wayr owt jos laik kloaz.
Yu wahn chaynj dehn jos laik how wahn persn chaynj kloaz, ahn dehn wahn disapyaa.
27 Bot yoo noh chaynj,Ahn di amonk a yaaz weh yu liv noh wahn ga no en.
28 Di plays weh yu servant dehn chiljren liv wahn bee dehn hoam fareva an eva,Ahn fi dehn chiljren wahn aalwayz liv eena pees fronta yoo.”
Futnoat
^ Er “Pleez ben dong ahn lisn.”
^ Dis ku aalso bee “Ah da loan skin ahn boanz.”
^ Si di Glasari, “Kers.”
^ Er “di skai.”
^ Er “di skai.”
