Saam 104:1-35
104 Ah waahn prayz Jehoava.
Mi Gaad, Jehoava, yoo da wahn grayt Gaad.
Yoo jres op eena aana ahn gloari.
2 Lait rap op rong yu laik wahn roab;Yu schrech owt hevn laik wahn tent klaat.
3 Yu bil yu hows oava di klowdz,Ahn di klowdz da yu chariyat,Ahn yu moov bowt pahn di wingz a di breez.
4 Yu mek yu aynjelz powaful;Yu mek dehn bee laik wahn faiya weh di blayz.
5 Yu set di ert pahn wahn schrang fongdayshan;Ih wahn stay wehpaat yu put it fareva an eva.
6 Yu kova di ert wid deep waata laik wahn klaat.
Di waata kova di mongtin dehn.
7 Yoo koman di waata dehn fi jraa bak, ahn dehn lisn tu yu.
Wen dehn hyaa yu tonda, dehn ron weh fraitn;
8 Dehn ron weh ahn setl eena di plays weh yoo mek fi dehn.
Soh di mongtin dehn rayz op ahn di vali dehn sink dong.
9 Yoo set wahn bongjri fi dehn weh dehn kyaahn paas,Soh dat dehn kyaahn kova di ert eva agen.
10 Yu put sohn waata spring eena di vali* dehn,Ahn yu mek dehn floa bitween di mongtin dehn.
11 Di waata spring dehn provaid waata fi aala di wail animal dehn eena di feel,Ahn di wail dongki dehn jrink fan it.
12 Di berd dehn mek dehn lee nes eena di chree dehn langsaid di waata,Ahn dehn sing fahn monks di chree dehn.
13 Yoo mek rayn kohn dong fahn di skai fi waata di mongtin dehn,Ahn yu ful op di ert wid di tingz weh yu mek.
14 Yu mek graas groa fi di animal dehn eena di paascha,Ahn yu gi peepl plaants fi yooz,Soh dat food ku groa pahn di lan.
15 Yu gi peepl wain fi mek dehn haat hapi,Ail fi mek dehn skin smood,Ahn bred soh dat dehn ku ga schrent.
16 Oa Jehoava, di seeda chree dehn weh yoo plaant da LebanonAalwayz geh plenti waata.
17 Rait deh di berd dehn mek dehn nes,Ahn di stoark dehn liv eena di joonipa chree.
18 Di mongtin goat dehn liv pahn sohn hai mongtin,Ahn di plays dehn weh ga lata rak da weh di rak baja* dehn tek shelta.
19 Yoo mek di moon soh dat wi ku noa di taim a di yaa,Ahn di son noa egzakli wen fi goh dong.
20 Yoo mek nait set een, an ih geh daak,Ahn dat da wen aala di wail animal dehn kom owt.
21 Di laiyan* dehn roar wail dehn di hont,Ahn dehn luk fi di food weh Gaad provaid.
22 Wen di son kom op bak,Dehn goh bak goh lidong eena dehn kayv.
23 Peepl goh da werk,Ahn dehn werk haad til eevnin kohn.
24 Oa Jehoava, yu mek wahn lata tingz!
Yu yooz yu wizdom fi mek dehn,Ahn di ert ful op a tingz weh yu mek.
25 Luk pahn how big di see;Aal kaina animal weh big ahn smaal liv een deh;Da soh moch a dehn dat nobadi ku eevn konk dehn.
26 Da rait deh di ship dehn chravl,Ahn yu mek di Levaiyatan* fi play een deh.
27 An aala dehn wayt fi yuSoh dat yu ku gi dehn food da di rait taim.
28 Dehn eet wateva yu gi dehn.
Wen yoo oapm yu han fi feed dehn, yoo gi dehn lata gud tingz.
29 Wen yu haid yu fays, dehn geh fraitn.
If yoo tek weh dehn bret, dehn ded ahn dehn goh bak tu dos.
30 An if yu yooz yu powa, yu ku gi laif.
Yoo mek nyoo laif egzis pahn di ert.
31 Jehoava gloari wahn laas fareva.
Jehoava wahn rijais sayka aala di tingz weh hihn du.
32 Hihn luk pahn di ert, ahn di ert staat tu chrimbl,An ih toch di mongtin dehn, ahn dehn staat tu smoak.
33 Ah wahn sing tu Jehoava fi di res a mi laif;Fi az lang az Ah liv Ah wahn sing prayz tu* mi Gaad.
34 Ah hoap dat hihn hapi wid di tingz weh Ah tink bowt.*
Ah wahn rijais sayka Jehoava.
35 Sinaz wahn disapyaa fahn di ert,Ahn wikid peepl noh wahn egzis nohmoh.
Ai wahn prayz Jehoava. Prayz Jah!*
Futnoat
^ Er “wadi.” Si di Glasari, “Wadi.”
^ Dis da wahn animal weh luk laik wahn big rat, bot ih noh ga wahn tayl. An ih liv eena wahn plays weh ga lata rak.
^ Er “yong mayl laiyan.”
^ Si di Glasari, “Levaiyatan.”
^ Er “mek myoozik fi.”
^ Dis ku aalso bee “Mek di tingz weh Ah tink bowt hihn bring hapinis.”
^ Er “Halelooya!” “Jah” da di shaat way fi seh Jehoava naym.
