Saam 105:1-45
-
Di tingz weh Jehoava du fi shoa dat ih faytful tu ih peepl
105 Gi tanks tu Jehoava, ahn yooz ih naym wen yu pray tu ahn.
Mek evribadi noa bowt di tingz weh hihn du!
2 Sing tu ahn, mek myoozik far ahn,An tink bowt* aala di wandaful tingz weh hihn du.
3 Boas bowt ih hoali naym.
Mek evribadi weh di saach fi Jehoava rijais eena dehn haat.
4 Goh tu Jehoava ahn put yu chros eena fi hihn schrent.
Aalwayz luk tu ahn fi help.
5 Noh ferget di wandaful tingz weh hihn du,Ahn noh ferget di miraklz weh hihn du, ner di disizhanz weh hihn mek.
6 Yes, aala di disendant dehn fahn Gaad servant Aybraham,An aala Jaykob disendant dehn, weh Gaad mi pik, unu noh fi ferget dehndeh tingz.
7 Hihn da fi wee Gaad, Jehoava.
Hihn joj di hoal ert.
8 Hihn neva eva ferget di kovenant*Ner di pramis weh hihn mek tu fi hihn peepl,
9 Di kovenant weh ih mek wid Aybraham,Ahn di vow weh ih mek tu Aizak.
10 Ahn fi bak op da vow weh ih mek, hihn mek wahn pramis tu Jaykob.
Yes, ih mek wahn kovenant wid Izrel, wan weh wahn laas.
11 Ih tel ahn, “Ah wahn gi yu di hoal a Kaynan,Ahn dat wahn bee yu inheritans.”
12 Ahn hihn mek dis pramis wen da mi onli lee bit a dehn.
Yes, da mi jos lee bit a dehn, ahn dehn da-mi farinaz.
13 Dehn moov fahn wan nayshan tu di neks,Ahn fahn kingdom tu kingdom.
14 Hihn neva alow enibadi fi hert dehn,Ahn bikaaz a dehn, hihn mi karek sohn king.
15 Ih seh, “Noh hert di peepl dehn weh Ah pik,Ahn noh du notn bad tu mi prafit dehn.”
16 Hihn kaaz wahn famin eena di lan;Ahn dehn neva ga inof food.*
17 Hihn sen wahn man weh naym Joazef heda dehn;Dehn mi sel hihn az wahn slayv.
18 Dehn chayn op ih fut,Ahn dehn chayn op ih nek.*
19 Gaad werdz da weh mi help ahn fi bee eevn moa pyoar,*Til di taim kohn fi mek Jehoava pramis kohn chroo.
20 Di king giv aadaz fi mek dehn let ahn goh,Ahn dehn set ahn free.
21 Hihn put ahn in chaaj a ih howsAhn mek ih rool oava di hoal lan.
22 Hihn mi giv ahn kompleet atariti oava di hai ofishal dehn*An atariti fi teech fi hihn eldaz* fi bee waiz.
23 Den Jaykob* kohn liv da Eejip,An ih liv da Ham az wahn farina.
24 Gaad mek ih peepl dehn ga lata pikni;Hihn mek dehn bee moa powaful dan dehn enimiz.
25 Hihn lef di enimi dehn fi hayt ih peepl,Ahn fi mek planz fi goh gens ih servant dehn.
26 Hihn pik Moaziz an Ayron,Ahn sen dehn fi bee fi hihn mesinja dehn.
27 Gaad yooz dehn fi perfaam sohn sain monks di peeplAhn sohn mirakl eena Ham teritori.
28 Dehn obay evriting weh hihn seh;Hihn sen daaknis ahn di hoal lan geh daak.
29 Hihn ton dehn waata intu blodAhn kil aala dehn fish.
30 Dehn lan mi kova op wid frag,Ahn di frag dehn mi eevn deh eena aala di king room dehn.
31 Gaad sen sohn big flai eena dehn lan,An ih sen sohn smaal lee flai weh bait eena aala dehn teritori.
32 Hihn ton dehn rayn intu haylstoan,An ih sen laitnin* oava dehn lan.
33 Hihn kil aala dehn plaants ahn fig chree;Hihn dischrai aala di chree eena dehn teritori.
34 Hihn sen sohn yong loakos eena dehn lan;Da mi soh moch dat yu kudn eevn konk dehn.
35 Dehn eet op aala di plaant dehn eena di lanAn evriting weh di chree dehn projoos.
36 Den hihn kil aala di fersbaan dehn eena di lan,Di fers pikni weh dehn mi gat.
37 Wen hihn reskyu ih peepl, hihn mek dehn lef wid lata silva ahn goal;Ahn nobadi fahn monks fi hihn chraib dehn mi week.
38 Di Ijipshan dehn mi onli hapi wen di Izrelait dehn lef,Bikaaz dehn mi frayd fi dehn.
39 Hihn set wahn klowd fi protek ih peeplAhn wahn faiya fi mek dehn ku si da nait.
40 Wen dehn aks fi meet, hihn sen sohn lee berd;*Hihn gi dehn wahn lata bred fahn hevn.
41 Hihn split oapm wahn rak ahn waata kom owta it;Di waata floa chroo di dezert laik wahn riva.
42 Hihn du aala dehn tingz bikaaz hihn rimemba di hoali pramis weh ih mi mek tu ih servant Aybraham.
43 Soh hihn reskyu ih peepl, ahn dehn mi onli hapi;Hihn reskyu di wan dehn weh hihn pik, ahn dehn showt owt wid jai.
44 Hihn gi dehn di lan weh mi bilangz tu ada nayshanz;Dehn mi inherit evriting weh ada peepl werk haad fa.
45 Hihn du dat soh dat ih peepl ku kip ih komanment dehnAn obay ih laa dehn.
Aala unu, prayz Jah!*
Futnoat
^ Dis ku aalso bee “taak bowt.”
^ Si di Glasari, “Kovenant.”
^ Er “Ahn hihn brok evri bred rad.” Dis praabli di rifaa tu di rad dehn weh dehn wuda yooz fi heng op bred weh shayp laik wahn ring.
^ Er “An ih soal mi tai op wid aiyan.”
^ Di Heebroo werd di rifaa tu wen yu melt wahn metal fi mek it pyoar.
^ Lit., “prins dehn.”
^ Si di Glasari, “Elda.”
^ Er “Izrel.”
^ Er “faiya.”
^ Lit., “kwayl.” Dis da wahn smaal berd weh bowt 7 inchiz (18 cm) lang. Dis berd fat an ih gud fi eet.
^ Er “Halelooya!” “Jah” da di shaat way fi seh Jehoava naym.
