Saam 107:1-43
107 Gi tanks tu Jehoava, kaaz hihn gud;Fi hihn lov* laas fareva.
2 Dat da weh aala dehn wan weh Jehoava sayv shuda seh,Di saym wan dehn weh hihn mi reskyu fahn dehn enimiz,
3 Ahn weh hihn mi gyada fahn di ada konchri dehn.
Hihn mi gyada dehn fahn di ees, fahn di wes,*Fahn di naat, ahn fahn di sowt.
4 Dehn waak bowt eena di emti wildanes,*Bot dehn kudn fain di way tu wahn siti weh dehn ku liv.
5 Dehn mi hongri ahn dehn mi tersti;Dehn mi* soh taiyad dat dehn mi week anaal.
6 Dehn mi kip di krai owt tu Jehoava,Ahn hihn mi sayv dehn fahn dehn chroblz.
7 Hihn gaid dehn eena di rait dairekshanFi mek dehn ku reech wahn siti weh dehn ku liv.
8 Mek evribadi gi tanks tu Jehoava fi di lov* weh hihn shoaAhn fi di wandaful tingz weh hihn du fi peepl,
9 Bikaaz hihn gi waata tu peepl weh tersti,Ahn hihn gi gud food tu peepl weh hongri.
10 Som a dehn mi-di liv eena deep daaknis.
Dehn da-mi priznaz weh mi-di sofa, ahn dehn mi chayn op,
11 Bikaaz dehn gaahn gens weh Gaad mi tel dehn fi du,Ahn dehn neva obay di inschrokshanz weh di Moas Hai mi gi dehn.
12 Hihn mi alow dehn fi goh chroo haad taimz soh dat ih ku hombl dehn.
Dehn mi faal dong,* ahn nobadi mi dehdeh fi help dehn.
13 Dehn mi krai owt tu Jehoava fi help,Ahn hihn mi sayv dehn fahn dehn chroblz.
14 Hihn tek aaf di chayn dehn weh mi deh pahn dehn,Ahn hihn bring dehn owta deep daaknis.
15 Mek evribadi gi tanks tu Jehoava fi di lov* weh hihn shoaAhn fi di wandaful tingz weh hihn du fi peepl.
16 Ih brok dong di kapa doa dehn,An ih kot chroo di aiyan baar dehn weh lak di doa.
17 Dehn mi foolish ahn dehn mi sofaSayka weh dehn mi sin ahn mek lata mistayk.
18 Dehn neva waahn eet no food,Ahn sayka dat dehn nayli ded.
19 Dehn wuda krai owt tu Jehoava fi help,Ahn hihn wuda sayv dehn fahn dehn chroblz.
20 Hihn wuda gi di koman fi heel dehnAhn reskyu dehn fahn di pit weh dehn mi chrap eena.
21 Mek evribadi gi tanks tu Jehoava fi di lov* weh hihn shoaAhn fi di wandaful tingz weh hihn du fi peepl.
22 Mek dehn aafa op sakrifais fi giv tanks tu ahnAn feel hapi wen dehn taak bowt di tingz weh hihn du.
23 Dehn wan weh chravl pahn shipFi du bizniz kraas di see,
24 Aala dehn si di tingz weh Jehoava du,Di byootiful tingz weh hihn mek weh deh eena di see.
25 Dehn si how hihn jos gi di koman ahn schrang breez staat tu bloaAhn lif op di wayvz eena di see.
26 Di wayvz lif di sayla dehn op haiAhn slam dehn bak dong eena di midl a di see.
Den dehn looz dehn korij bikaaz dehn noa dehn deh eena wahn daynjaros sichuwayshan.
27 Dehn staga ahn raak bak ahn foat laik if dehn jronk;Aal di skilz weh dehn laan kyaahn eevn help dehn.
28 Den dehn krai owt tu Jehoava,Ahn hihn sayv dehn fahn dehn chroblz.
29 Den hihn kaam dong di schrang breez,Ahn hihn kwaiyet dong di wayvz eena di see.
30 Dehn staat tu rijais wen di see geh kaam,Ahn hihn leed dehn tu wehpaat dehn mi waahn goh.
31 Mek evribadi gi tanks tu Jehoava fi di lov* weh hihn shoaAhn fi di wandaful tingz weh hihn du fi peepl.
32 Mek dehn prayz hihn monks aal di peepl,Ahn mek dehn prayz hihn monks di elda* dehn.
33 Hihn ton di riva dehn intu wahn dezert,Ahn di waata spring dehn intu jrai lan,
34 Ahn hihn ton gud lan intu wahn lan wehpaat notn groa,Bikaaz a di wikid tingz weh di peepl weh liv deh mi-di du.
35 Hihn ton di dezert intu wahn layk wid lata plaants rong it,Ahn hihn ton lan weh jrai intu wahn waata spring.
36 Hihn mek dehn wan weh hongri liv dehSoh dat dehn ku bil op wahn siti wehpaat dehn ku liv.
37 Dehn plaant seed eena sohn feel ahn grayp aachadWeh projoos lata froot.
38 Hihn bles dehn ahn dehn ga lata pikni;Hihn mek dehn kantinyu fi geh moa ahn moa kyatl.
39 Bot bikaaz peepl chreet dehn kruwil ahn bikaaz a di chroblz ahn payn weh dehn mi-di goh chroo,Dehn mi staat tu feel shaym agen ahn di nomba a peepl staat tu geh les ahn les aal oava agen.
40 Hihn hayt di roola dehn,An ih mek dehn wanda bowt eena di dezert wehpaat no road deh.
41 Bot hihn protek di poa peepl dehn fahn persikyooshan,An ih mek dehn famili bee az big az wahn flak a sheep.
42 Wen di raichos wan dehn si dat, dehn rijais,Bot aala di wikid wan dehn noh ga notn fi seh.
43 Enibadi weh waiz wahn pay atenshan tu dehndeh tingzAhn tink gud bowt di tingz weh Jehoava du fi shoa ih lov.*
Futnoat
^ Er “laayal lov.” Si di Glasari, “Laayal lov.”
^ Er “fahn weh di son raiz ahn weh di son set.”
^ Si di Glasari, “Wildanes.”
^ Er “Dehn soal mi.” Si di Glasari, “Soal.”
^ Er “laayal lov.”
^ Er “stombl.”
^ Er “laayal lov.”
^ Er “laayal lov.”
^ Er “laayal lov.”
^ Si di Glasari, “Elda.”
^ Er “laayal lov.”
