Saam 109:1-31
Dis da fi di dairekta. Dis da Dayvid sang.
109 Oa Gaad, di wan weh Ah prayz, pleez noh stay kwaiyet.
2 Peepl weh wikid ahn weh chriki taak bad bowt mi.
Dehn tel loan lai bowt mi;
3 Dehn sorong mi ahn seh loan terabl tingz bowt mi;Dehn atak mi fi no reezn.
4 Dehn goh gens mi eevn doa Ah shoa dehn lov;Bot Ai kantinyu fi pray.
5 Ah du gud tingz fi dehn ahn dehn pay mi bak wid loan bad tingz,Ahn wen Ah shoa dehn lov, dehn pay mi bak wid loan hayt.
6 Mek wahn wikid persn joj mi enimi.
Yes, mek wahn wikid persn stan op da ih rait han said fi akyooz ahn.
7 Wen dehn joj ahn, mek dehn joj ahn az gilti;*An eevn wen ih pray, kansida ih pryaa az wahn sin.
8 Mek ih laif bee shaat,Ahn mek sohnbadi els tek weh di pozishan weh ih gat az wahn oavaseeya.
9 Lef ih pikni dehn* widowt wahn pa,Ahn lef ih waif az wahn wido.
10 Mek ih pikni dehn* waak rong di beg,Ahn mek dehn lef fahn dehn hows weh deh eena rooinz fi goh luk fi food.
11 Mek di peepl dehn weh ih oa tek aala ih bilanginz,Ahn mek schraynjaz teef di tingz weh ih oan.
12 Ah hoap dat nobadi shoa ahn eni kainis,*An Ah hoap dat nobadi ga mersi pan ih pikni dehn weh ih lef bihain.
13 Waip owt ih disendant* dehn,An irays aala dehn naym fahn dis jenarayshan, soh dat di neks jenarayshan noh wahn noa notn bowt dehn.
14 Mek Jehoava memba aala di mistayk weh ih ansesta dehn mek,Ahn di sin dehn weh ih ma komit.
15 Ah hoap dat Jehoava aalwayz memba aala di wikid tingz weh dehn du,An Ah hoap dat Hihn mek evribadi pahn di ert ferget dehn naym.
16 Bikaaz hihn mi ferget fi shoa kainis.*
Insted, ih stay goh afta dehn wan weh di sofa, weh poa, ahn weh ga sadnis eena dehn haat;Ih goh afta dehn fi kil dehn.
17 Hihn mi laik kers* adaz, soh dehndeh kers kohn bak pahn hihn sayhn wan,Ahn sins hihn neva laik bles peepl, hihn neva geh no blesin.
18 Hihn wayr di kers dehn laik wahn roab.
Ahn di kers dehn floa eena ih badi laik waata,Ahn sink eena ih boan dehn laik ail.
19 Mek ih kers dehn stik tu ahn laik di sayhn roab weh ih rap rong ihself,Ahn laik wahn belt weh ih aalwayz wayr.
20 Dis da weh Jehoava wahn du tu enibadi weh deh gens mi,Ahn tu enibadi weh seh wikid tingz bowt mi.
21 Bot yoo, Oa Moas Hai Laad Jehoava,Sayv mi soh dat yu ku aana yu naym.
Sayv mi, bikaaz yu lov* soh grayt,
22 Kaaz nobadi deh fi help mi an Ah poa,An Ah feel wahn payn deep eena mi haat.
23 Ah di fayd weh laik wahn shado;Dehn brosh mi aaf laik if Ai da wahn loakos pahn wahn pees a kloaz.
24 Ah kyaahn eevn stan op sayka weh Ah di faas;*Ah maaga; Ah da loan skin ahn boanz.
25 Dehn insolt mi op.
Wen dehn si mi, dehn shayk dehn hed.
26 Oa Jehoava mi Gaad, help mi;Sayv mi ahn shoa yu lov fi mi.*
27 Den dehn wahn noa, Oa Jehoava,Dat yoo da di wan weh sayv mi.
28 Dehn wahn kers mi, bot yoo wahn bles mi.
Wen dehn kohn gens mi, yu wahn mek dehn luk shaym,Bot yu servant wahn rijais.
29 Kova dehn wan weh deh gens mi wid shaym;Mek dehn shaym rap rong dehn laik wahn roab.*
30 Ah wahn prayz Jehoava wid aala mi haat;Ah wahn prayz hihn fronta lata peepl.
31 Hihn wahn difen* enibadi weh poa,Soh dat ih ku sayv dehn fahn peepl weh chrai dischrai dehn.*
Futnoat
^ Er “wikid.”
^ Lit., “son dehn.”
^ Lit., “son dehn.”
^ Er “laayal lov.” Si di Glasari, “Laayal lov.”
^ Er “fyoocha jenarayshan.”
^ Er “laayal lov.”
^ Si di Glasari, “Kers.”
^ Er “laayal lov.”
^ Si di Glasari, “Faas.”
^ Er “yu laayal lov.”
^ Er “sleevles koat.”
^ Lit., “stan op pahn di rait han said a.”
^ Er “dehn soal.” Si di Glasari, “Soal.”
