Saam 118:1-29
118 Gi tanks tu Jehoava, kaaz hihn gud;Fi hihn lov* laas fareva.
2 Mek Izrel seh:
“Fi hihn lov* laas fareva.”
3 Mek Ayron disendant dehn seh:
“Fi hihn lov* laas fareva.”
4 Mek evribadi weh rispek* Jehoava seh:
“Fi hihn lov* laas fareva.”
5 Ah mi krai owt tu Jah* wen Ah mi-di sofa,Ahn Jah ansa mi ahn kehr mi da wahn sayf plays.
6 Jehoava deh pahn mai said, soh Ah noh wahn frayd.
Da weh enibadi ku du tu mee?
7 Jehoava deh pahn mai said fi help mi;*Ah wahn luk pahn how di peepl weh hayt mi looz di vikchri.
8 Ih beta fi mek wahn persn goh tu Jehoava fi sheltaDan fi put ih chros eena peepl.
9 Ih beta fi mek wahn persn goh tu Jehoava fi sheltaDan fi put ih chros eena di hai ofishal dehn.
10 Aala di nayshan dehn mi sorong mi,Bot bikaaz Ah mi rilai pahn di powa a Jehoava naym,Ah mi stap dehn fahn kohn kloasa.
11 Yes, dehn mi kompleetli sorong mi,Bot bikaaz Ah mi rilai pahn di powa a Jehoava naymAh mi stap dehn fahn kohn kloasa.
12 Dehn mi swaam rong mi laik bee,Bot dehn disapyaa jos az faas az how faiya bon op wahn prikl bush.
Ah mi stap dehn fahn kohn kloasa,Bikaaz Ah mi rilai pahn di powa a Jehoava naym.
13 Dehn push mi haad fi mek Ah jrap dong,Bot Jehoava help mi.
14 Jah da mai shelta ahn mai schrent,Ahn da hihn sayv mi.
15 Yu ku hyaa how di raichos wan dehn di rijais eena dehn tent; dehn mi geh salvayshan.
Jehoava di shoa ih grayt powa wid ih rait han.
16 Jehoava rayz op ih rait han bikaaz ih win di vikchri;Jehoava di shoa ih grayt powa wid ih rait han.
17 Ah wahn kantinyu liv, yes, Ah noh wahn ded,Soh dat Ah ku taak bowt aala di tingz weh Jah du.
18 Jah gi mi seeryos karekshan,Bot ih neva mek Ah ded.
19 Pleez oapm di gayt weh di raichos peepl dehn paas chroo,Soh dat Ah ku waak chroo ahn prayz Jah.
20 Dat da di gayt tu Jehoava hows.
Di raichos wan dehn gwehn chroo it.
21 Ai wahn prayz yoo, bikaaz yu ansa mi,Ahn yu sayv mi.
22 Di stoan weh di bilda dehn neva waahntEn op fi bee di moas impoatant kaanastoan.*
23 Da Jehoava mek dat hapm,Ahn tu wee dat da sohnting wandaful.
24 Wi wahn bee hapi ahn ful a jaiPahn di day weh Jehoava set.
25 Wi di bayg yu Jehoava, pleez sayv wi!
Pleez Jehoava, gi wi vikchri!
26 Di wan weh kohn fi reprizent Jehoava naym wahn ga fi hihn blesin;Wi aks Jehoava fi bles unu fahn fi hihn hows.
27 Jehoava da Gaad;Wi lait kohn fahn hihn.
Goh jain dehn wan weh di hed tu di festival wid branch eena dehn han,Ahn weh di goh op tu di haan dehn pahn di alta.
28 Yoo da mai Gaad, an Ai wahn prayz yu;Ai wahn gi yu gloari, Oa mi Gaad.
29 Gi tanks tu Jehoava kaaz hihn gud;Fi hihn lov* laas fareva.
Futnoat
^ Er “laayal lov.” Si di Glasari, “Laayal lov.”
^ Er “laayal lov.”
^ Er “laayal lov.”
^ Lit., “fyaa.”
^ Er “laayal lov.”
^ “Jah” da di shaat way fi seh Jehoava naym.
^ Dis ku aalso bee “Jehoava deh pahn mai said lang wid dehn wan weh di help mi.”
^ Lit., “di hed a di kaana.”
^ Er “laayal lov.”
