Saam 141:1-10
Dis da Dayvid sang.
141 Oa Jehoava, Ah kaal pahn yu.
Hori kohn help mi.
Pleez pay atenshan wen Ah kaal owt tu yu.
2 Mek mi pryaa bee laik insens weh dehn pripyaa gud fi kehr fronta yoo.
Ahn wen Ah rayz mi han dehn fi pray, mek dat bee laik wahn grayn aafrin tu yoo.
3 Set wahn gyaad fronta mi mowt, Oa Jehoava,Fi mek ih kip wach oava di tingz weh Ah wahn seh.
4 Pleez noh mek mi haat waahn du tingz weh bad,Fi tek paat eena wikid tingz weh wikid peepl du;Ai neva waahn tays dehn fansi food.
5 If wahn raichos persn wuda ponish mi, da bikaaz ih ga lata lov* fi mi;If ih wuda disiplin mi, da laik if ih di put ail pahn mi hed,An Ah wuda neva seh no tu dat.
Ah wahn kantinyu pray far ahn eevn wen ih di goh chroo haad taimz.
6 Eevn doa som a di peepl chroa dehn roolaz oava di klif,Di peepl wahn stil lisn tu mi werdz, bikaaz dehn song gud.
7 Jos laik how soil skyata aal oava di plays wen sohnbadi di plow,Da rait soh wi boanz wahn geh skyata bowt bai di enchrans a di Grayv.*
8 Bot Ah luk tu yoo, Moas Hai Laad Jehoava.
Ah goh tu yoo fi tek shelta.
Noh tek weh mi laif.*
9 Protek mi soh dat Ah noh geh kech eena di chrap weh dehn set fi mi,Eena di chrap weh wikid peepl set.
10 Aala dehndeh wikid peepl wahn jrap eena dehn oan chrap sayhn taim,Ahn wen Ah paas bai dehndeh chrap, notn wahn hapm tu mi.
Futnoat
^ Er “ga laayal lov.” Si di Glasari, “Laayal lov.”
^ Er “Sheeyol,” weh da di Grayv. Si di Glasari, “Grayv.”
^ Er “poar owt mi soal.” Si di Glasari, “Soal.”
