Saam 144:1-15
Dis da Dayvid sang.
144 Prayz Jehoava, hoo da mai Rak.
Hihn chrayn mi han dehn fi fait eena batlAhn mi finga dehn fi fait eena waar.
2 Hihn da mai sayf plays ahn di wan weh shoa mi lov;*Hihn da mai sayf shelta* ahn di wan weh reskyu mi;Hihn da mai sheel ahn di wan weh Ai goh tu fi geh protekshan;Hihn da di wan weh put peepl anda mai atariti.
3 Oa Jehoava, da hoo wee soh dat yu noatis wi?
Ahn da wai yoo eevn pay atenshan tu di son a wahn man?
4 Hyoomanz da jos laik wahn bret;Dehn laif paas bai jos laik wahn shado.
5 Oa Jehoava, kohn dong, laik if yu bring di skai kloasa tu di grong;Toch di mongtin dehn ahn mek dehn smoak.
6 Mek laitnin flash ahn skyata mi enimi dehn;Shoot yu aro dehn ahn mek dehn geh kanfyooz.
7 Reech owt tu mi fahn op da hevn;Reskyu mi ahn sayv mi fahn di deep waata wid schrang wayvzAhn fahn di farina dehn.
8 Yes, sayv mi fahn di farina dehn weh laiyadAhn weh rayz dehn rait han ahn swayr fi tel di chroot, bot plan fi tel loan lai insted.
9 Oa Gaad, Ah wahn sing wahn nyoo sang fi yu.
Ah wahn sing sohn sang fi prayz* yu, lang wid di myoozik fahn wahn inschrument weh ga ten schring.
10 Ah wahn sing tu di wan weh gi di king dehn vikchri,*Tu di wan weh sayv ih servant Dayvid fahn di soad.
11 Reskyu mi ahn sayv mi fahn di farina dehn weh laiyadAhn weh rayz dehn rait han ahn swayr fi tel di chroot, bot plan fi tel loan lai insted.
12 Du dat soh dat wi son dehn wahn ku geh big kwik, jos laik how yong plaants groa faas,Ahn soh dat wi daata dehn wahn ku bee laik di byootiful kolom dehn weh dehn put eena wahn palis.
13 Wi stoarhows dehn wahn oavafloa wid aal kaina food,Ahn wi animal dehn weh deh eena wi feel wahn bee tu moch fi eevn konk.
14 Wi kyatl dehn weh pregnant noh wahn ga no aksident ner looz dehn baybi;An eena di oapm ayrya wehpaat di peepl gyada tugeda, nobadi wahn di krai bikaaz dehn sad.
15 Evribadi weh ekspeeryens aala dehndeh tingz wahn bee hapi!
Evribadi weh serv Jehoava Gaad wahn bee hapi!
Futnoat
^ Er “laayal lov.” Si di Glasari, “Laayal lov.”
^ Er “wahn hai mongtin fi ron tu.”
^ Er “mek myoozik fi.”
^ Er “salvayshan.”
