Saam 145:1-21
Dayvid rait dis sang fi aafa prayz.
א [Aleph]*
145 Ah wahn gi yu gloari, mi Gaad ahn King;Ah wahn prayz yu naym fareva an eva.
ב [Beth]
2 Ah wahn prayz yu aal day lang;Ah wahn prayz yu naym fareva an eva.
ג [Gimel]
3 Jehoava grayt, ahn hihn dizerv prayz;Nobadi ku andastan how grayt hihn grayt.
ד [Daleth]
4 Evri jenarayshan wahn prayz yu fi di tingz weh yoo du,Ahn dehn wahn taak bowt di powaful tingz weh yu du.
ה [He]
5 Dehn wahn taak bowt yu wandaful gloari,An Ah wahn meditayt pahn di amayzin tingz weh yoo du.
ו [Waw]
6 Dehn wahn taak bowt yu amayzin powa,An Ai wahn tel evribadi bowt how grayt yoo grayt.
ז [Zayin]
7 Dehn hapinis wahn oavafloa wen dehn tink bowt aala di gud tingz weh yoo du,Ahn dehn wahn showt wid jai bikaaz yoo raichos.
ח [Heth]
8 Jehoava ga kompashan an ih shoa lata mersi;Ih noh eezi fi geh beks an ih shoa wahn lata lov.*
ט [Teth]
9 Jehoava du gud tingz fi evribadi,An eena evriting weh hihn du, ih klyaa fi si fi hihn mersi.
י [Yod]
10 Oa Jehoava, aal di tingz weh yoo du wahn bring yu aana,Ahn dehn wan weh laayal tu yoo wahn prayz yu.
כ [Kaph]
11 Dehn wahn tel evribadi bowt how wandaful yu roolaship,Ahn dehn wahn taak bowt yu powa.
ל [Lamed]
12 Dehn wahn du dat soh dat evribadi ku noa bowt aala di powaful tingz weh yu du,Ahn how wandaful an amayzin yu roolaship.
מ [Mem]
13 Yu roolaship wahn laas fareva,Ahn yu kingdom wahn laas chroo evri jenarayshan.
ס [Samekh]
14 Jehoava help hoal op aala di wan dehn weh di jrap dong,Ahn hihn pik op aala di wan dehn weh ga lata prablemz weh di way dehn dong.
ע [Ayin]
15 Evribadi luk tu yoo wid hoap;Yoo gi dehn food da di rait taim.
פ [Pe]
16 Yu ga yu han waid oapm,Ahn yu satisfai evribadi an aala di animalz.
צ [Tsade]
17 Evriting weh Jehoava du shoa dat ih raichos ahn dat hihn laayal.
ק [Qoph]
18 Jehoava deh kloas tu evribadi weh di kaal owt tu hihn;Hihn deh kloas tu dehn wan weh di kaal owt tu ahn wid wahn sinsyaa haat.
ר [Resh]
19 Hihn satisfai aala dehn wan weh ga rispek* far ahn;Hihn hyaa wen dehn di krai owt tu ahn fi help, ahn hihn sayv dehn.
ש [Shin]
20 Jehoava protek evribadi weh lov ahn,Bot hihn wahn dischrai evribadi weh wikid.
ת [Taw]
21 Ah wahn yooz mi mowt fi prayz Jehoava;Mek evribadi prayz fi hihn hoali naym fareva an eva.
Futnoat
^ Dis da di fers leta a di Heebroo alfabet. Si di Glasari, “Akrostik stail.”
^ Er “laayal lov.” Si di Glasari, “Laayal lov.”
^ Er “fyaa.”
