Saam 147:1-20
147 Prayz Jah!*
Da wahn gud ting fi mek wi sing fi prayz* wi Gaad;Da wahn byootiful ting fi prayz ahn, da di rait ting fi du!
2 Jehoava di bil bak Jeroosalem;Hihn gyada bak di Izrelait dehn weh mi skyata aal bowt di plays.
3 Hihn heel op dehn wan weh ga sadnis eena dehn haat;Hihn ban dehn op wehpaat dehn geh hert.
4 Hihn noa humoch staar deh eena di skai;Hihn ga wahn naym fi eech an evri wan a dehn.
5 Fi wee Laad grayt ahn ga lata powa;Fi hihn andastandin noh ga wahn limit.
6 Jehoava rayz op peepl weh hombl,Bot ih dash di wikid wan dehn tu di grong.
7 Sing tu Jehoava ahn giv ahn tanks;Sing prayz tu wi Gaad lang wid di myoozik fahn wahn haap.
8 Sing prayz tu di wan weh ful op di skai wid klowdz,Di wan weh mek rayn poar dong pahn di ert,Di wan weh mek graas groa pahn di mongtin dehn.
9 Hihn gi food tu di animal dehn.
Wen di yong rayven dehn kaal owt, hihn gi dehn food.
10 Aal di powa weh wahn haas gat da no big deel tu hihn;An if wahn man ga schrang legz, dat noh impres hihn needa.
11 Bot insted, Jehoava hapi wid dehn wan weh ga rispek far ahn,*Dehn wan weh di wayt fi mek hihn shoa dehn ih lov.*
12 Gi gloari tu Jehoava, Oa Jeroosalem.
Prayz yu Gaad, Oa Zaiyan.
13 Hihn mek yu siti gayt dehn sikyoar;Hihn bles di peepl dehn weh liv deh.
14 Hihn mek yu hoal teritori ga pees;Hihn mek unu injai di bes weet.
15 Hihn seh weh shuda hapm pahn di ert;Ahn di werdz fahn fi hihn koman chravl faas.
16 Wen ih kova di ert wid snoa, ih luk laik wahn wait blankit;Wen ih skyata di snoa, ih luk jos laik ashiz.
17 Ih chroa dong haylstoan* laik if da peesiz a bred.
Hoo ku handl di ais koal weda weh hihn sen?
18 Wen ih gi di koman, di ais melt.
Wen ih mek di breez bloa, di waata staat tu floa.
19 Hihn mek Jaykob noa ih komanment dehn;Hihn mek Izrel noa ih jojment ahn laa dehn.
20 Hihn noh du dat fi eni ada nayshan;Dehn noh noa notn bowt ih jojment dehn.
Prayz Jah!*
Futnoat
^ Er “Halelooya!” “Jah” da di shaat way fi seh Jehoava naym.
^ Er “mek myoozik fi.”
^ Er “weh fyaa hihn.”
^ Er “laayal lov.” Si di Glasari, “Laayal lov.”
^ Er “ais.”
^ Er “Halelooya!” “Jah” da di shaat way fi seh Jehoava naym.
