Saam 148:1-14
148 Prayz Jah!*
Prayz Jehoava fahn hevn;Prayz hihn fahn way op eena di haiyis plays dehn.
2 Mek aala fi hihn aynjel dehn prayz ahn.
Mek fi hihn aami eena hevn prayz ahn.
3 Mek di son ahn di moon prayz ahn.
Mek aala di staarz weh di shain prayz ahn.
4 Mek di skai an evriting eena it prayz ahn,Lang wid di rayn klowdz weh deh eena di skai.
5 Mek dehn prayz Jehoava naym,Bikaaz hihn gi di koman, ahn dehn staat tu egzis.
6 Hihn wahn kip dehn deh fareva an eva;Hihn gi wahn laa weh wahn neva chaynj.
7 Unu prayz Jehoava pahn di ert,Aala di big animal dehn eena di see an aala di deep oashan dehn;
8 Di laitnin ahn hayl, di snoa ahn di tik klowdz,Di schrang breez weh fala fi hihn koman;
9 Aala di mongtin ahn hil dehn,Aala di froot chree dehn an aala di seeda chree dehn, unu prayz ahn.
10 Di wail animal dehn ahn di taym animal dehn,Di berdz ahn di animal dehn weh kraal;
11 Aala di king dehn an aala di nayshan dehn,Aala di hai ofishal* an aala di joj dehn pahn di ert;
12 An aala di yong man dehn ahn di yong laydi dehn,Yes, di oalda wan dehn ahn di yonga wan dehn, unu prayz ahn.
13 Mek dehn prayz Jehoava naym,Fi hihn naym grayta dan evri ada naym.
Fi hihn gloari haiya dan hevn an ert.
14 Hihn wahn mek ih peepl geh schranga,Soh dat fi hihn laayal peepl ku geh aana,Yes, di Izrelait dehn, di peepl weh kloas tu hihn.
Prayz Jah!*
Futnoat
^ Er “Halelooya!” “Jah” da di shaat way fi seh Jehoava naym.
^ Lit., “prins.”
^ Er “Halelooya!” “Jah” da di shaat way fi seh Jehoava naym.
