Saam 17:1-15
Dayvid pryaa.
17 Oa Jehoava, pleez lisn tu how Ah di beg yu fi jostis;Lisn gud tu how Ah di krai owt tu yu fi help;Lisn tu mi pryaa weh Ah di seh wid wahn sinsyaa haat.
2 Ah pray dat yu mek wahn fyaa disizhan bowt mi;Ah pray dat yu aiy dehn si weh rait.
3 Yu saach chroo mi haat joorin di nait;Ahn yu kleen* mi haat,Soh yu wahn si dat Ah noh plan fi du eniting wikid,An Ah noh yooz mi mowt fi seh eniting bad.
4 Ih noh mata weh enibadi els du,Ai wahn lisn tu di werdz weh kom owta yu mowt; Ah noh fala eena di teef dehn futstep.
5 Pleez mek Ah kantinyu fi waak dong yu roadSoh dat Ah ku kantinyu fi obay yu.
6 Oa Gaad, Ah kaal pahn yu bikaaz Ah noa yu wahn ansa mi.
Pleez bring yu ayz kloas ahn lisn* tu weh Ah di seh tu yu.
7 Shoa yu lov* eena wahn wandaful way, Oa Gaad,Di wan weh reskyu dehn wan weh tek shelta pahn yu rait han saidFahn di wan dehn weh ribel gens yu.
8 Protek mi laik di senta a yu aiy;Haid mi eena di shado anda yu wing dehn.
9 Sayv mi fahn di wikid wan dehn hoo di atak mi,Fahn mi enimi dehn weh di sorong mi ahn waahn kil mi.
10 Dehn noh ga no kompashan;*Dehn laik boas bowt dehnself;
11 Now dehn krowd op rong wi;Dehn di luk fi wahn chaans fi hert wi.*
12 Di enimi da laik wahn laiyan weh kyaahn wayt fi tayr op ih viktim intu peesiz,Ih da laik wahn yong laiyan weh di haid ahn weh di wayt fi wahn perfek taim fi atak.
13 Oa Jehoava, get op, ahn goh aata ahn an schraik ahn dong;Yooz yu soad fi sayv mi fahn dehn wan weh wikid;
14 Yooz yu powa fi reskyu mi, Oa Jehoava,Fahn di man dehn eena disya werl,* weh onli inchrestid eena weh dehn ku get owta laif rait now,Di wan dehn weh yoo satisfai wid di lata gud tingz weh yoo gi dehnAhn weh lef wahn inheritans fi dehn lata pikni.
15 Bot az fi mee, Ai wahn kantinyu fi bee raichos, ahn dat da wai yu wahn bles mi.
Wen Ah wayk op Ah onli hapi, bikaaz Ah noa dat yoo deh wid mi.
Futnoat
^ Di Heebroo werd di rifaa tu wen yu melt wahn metal fi mek it pyoar.
^ Er “ben dong ahn lisn.”
^ Er “laayal lov.” Si di Glasari, “Laayal lov.”
^ Er “Dehn kova op eena dehn oan fat.”
^ Er “fi chroa wi dong tu di grong.”
^ Er “dis sistem a tingz.”
