Saam 18:1-50
Dis da fi di dairekta. Jehoava servant Dayvid rait dis sang fi Jehoava afta Jehoava mi reskyu ahn fan ih enimi dehn ahn fahn Saal. Dis da weh ih rait:
18 Ah lov yoo, Oa Jehoava. Da yoo gi mi schrent.
2 Jehoava da mai rak ahn mai sayf plays; hihn da di wan weh reskyu mi.
Mai Gaad da mai rak; Ai goh tu hihn fi geh protekshan.
Hihn da mai sheel ahn mai powaful sayvya;* hihn da wahn plays weh Ai goh fi feel sayf.
3 Ai kaal pahn Jehoava, di wan weh dizerv prayz,Ahn hihn sayv mi fahn mi enimi dehn.
4 Det mi deh kloas; da mi laik wahn roap weh tai op rong mi.
Sodn-wan, laik wahn flod, sohn wotlis man kohn ahn fraitn mi.
5 Da laik di Grayv* tai mi op wid roap;Det set wahn chrap fronta mi.
6 Wen Ah mi-di sofa, Ah kaal pahn Jehoava;Ah neva stap krai owt tu mi Gaad fi help.
Fan ih templ ih hyaa mi vais,An ih lisn wen Ah mi-di krai owt tu ahn fi help.
7 Di ert staat tu shayk ahn raak;Di mongtin dehn staat tu chrimblAhn shayk op bikaaz Ih mi beks bad.
8 Smoak kom owta ih noaz,Ahn wahn hat hat faiya kom owt fan ih mowt;Hat faiya koal blayz op fronta ahn.
9 Wen hihn kohn dong ih mek hevn ben dong anaal,Ahn sohn tik daak klowd mi deh anda ih fut.
10 Hihn kohn di raid pahn wahn cherob;*Ih kohn dong faas pahn wahn aynjel wing.
11 Den ih kova ihself wid wahn tent weh mek owta loan daaknis.
Ih kova ihself wid daak waata ahn tik klowd.
12 Di lait rong ahn mi soh braitDat ih mek hayl ahn faiya koal bos chroo di klowd dehn.
13 Den Jehoava mek ih tonda eena hevn;Di Moas Hai mek peepl hyaa ih vaisWid haylstoan ahn faiya koal.
14 Hihn shoot dehn wid ih boa an aro, ahn dehn skyata;Ih chroa dong ih laitnin, ahn dat lef dehn wel kanfyooz.
15 Oa Jehoava, yu raat ahn di bret fahn yu noazEkspoaz di batam a di schreem dehn ahn di ert fongdayshan.
16 Ih reech dong fahn way op deh;Ih grab mi ahn haal mi fahn owta di deep waata.
17 Ih sayv mi fahn mi enimi weh schrang,Fahn dehn wan weh hayt mi ahn weh schranga dan mi.
18 Dehn kom aata mi pahn di day wen Ah mi-di goh chroo lata chroblz,Bot Jehoava sopoat mi.
19 Hihn kehr mi da wahn sayf plays;Ih reskyu mi bikaaz ih mi hapi wid mi.
20 Jehoava riwaad mi akaadn tu mi raichosnis;Ih riwaad mi bikaaz Ah noh du notn bad.
21 Ah stik tu Jehoava way,An Ah noh lef mi Gaad; Ah wuda neva du sohnting soh wikid.
22 Aala fi hihn jojment dehn deh fronta mi;An Ah noh wahn rijek fi hihn laa dehn.
23 Ah noh wahn du notn fi mek ih fain faalt wid mi,An Ah wahn mek shoar Ah noh du notn rang.
24 Ah pray mek Jehoava pay mi bak akaadn tu mi raichosnis;Ah pray hihn pay mi bak bikaaz Ah inosent.
25 Yu laayal tu enibadi weh laayal tu yoo;Yu wahn bee fyaa wid wahn inosent man;
26 Yu gud tu peepl weh pyoar,Bot yu owtsmaat peepl weh chriki.
27 Yu sayv peepl weh hombl,*Bot yu shaym peepl weh prowd.
28 Oa Jehoava, yoo lait op mi lamp;Da yoo lait op di daaknis rong mi.
29 Wid fi yoo help Ah ku atak wahn groop a teef;Wid Gaad powa Ah ku klaim wahn waal.
30 Evriting weh di chroo Gaad du perfek;Evriting weh Jehoava seh pyoar.
Hihn da wahn sheel fi enibadi weh goh tu hihn fi protekshan.
31 No Gaad noh deh eksep Jehoava.
Ahn no rak noh deh eksep fi wee Gaad.
32 Di chroo Gaad da di wan weh jres mi op wid schrent,Ahn hihn wahn mek mi road schrayt.
33 Ih mek Ah moov faas laik wahn dyaa;Ih mek Ah stan op pahn sohn hai plays.
34 Hihn chrayn mi fi waar;Ah ku ben wahn boa weh mek owta kapa.
35 Yoo gi mi yu sheel fi sayv mi,Yu rait han sopoat mi,Ahn bikaaz yu hombl, yu rayz mi op.
36 Yoo klyaa di road fi miFi mek Ah noh jrap dong.
37 Ah wahn chays mi enimi dehn til Ah kech op tu dehn ahn kanka dehn;Ah noh wahn kom bak til Ah don dischrai aala dehn.
38 Ah wahn mash dehn op soh dat dehn kyaahn get op agen;Dehn wahn jrap dong an Ah wahn put mi fut pahn dehn.
39 Yoo wahn gi mi di schrent fi fait;Yu wahn help mi kanka mi enimi dehn.
40 Yoo wahn mek mi enimi dehn ron weh fahn mi,An Ah wahn dischrai* dehn wan weh hayt mi.
41 Dehn baal fi help, bot nobadi dehdeh fi sayv dehn;Dehn eevn baal tu Jehoava, bot hihn noh ansa dehn.
42 Ah wahn grain dehn dong til dehn da laik dos weh bloa bowt eena di breez;Ah wahn chroa dehn weh laik mod pahn di schreet.
43 Yu wahn sayv mi fahn peepl weh fain faalt wid mi.
Yu wahn put mi fi bee di leeda oava lata nayshanz.
Wahn nayshan weh Ah noh noa wahn serv mi.
44 Dehn wahn obay mi bikaaz a weh dehn hyaa bowt mi;Farinaz wahn bow dong tu mi sayka weh dehn frayd.
45 Farinaz wahn looz korij;*Dehn wahn kom owt fahn dehn sayf plays di chrimbl.
46 Jehoava alaiv! Prayz mi Rak!
Prayz mi Gaad weh sayv mi.
47 Di chroo Gaad tek rivenj pahn aala mi enimi dehn fi mi;Hihn put peepl anda mai atariti.
48 Hihn sayv mi fahn mi enimi dehn weh beks bad;Yoo lif mi op faar fahn dehn wan weh atak mi;Yu sayv mi fahn vailent peepl.
49 Oa Jehoava, dat da wai Ah wahn aana yoo monks di nayshan dehn,An Ah wahn sing prayz tu* yu naym.
50 Hihn du wandaful tingz fi sayv mee, fi hihn king;Hihn aalwayz shoa lov* tu di wan weh hihn pik,Yes, tu mee, Dayvid, ahn tu mi disendant dehn fareva.
Futnoat
^ Lit., “haan a salvayshan.” Si di Glasari, “Haan.”
^ Er “Sheeyol,” weh da di Grayv. Si di Glasari, “Grayv.”
^ Si di Glasari, “Cherob.”
^ Er “weh di sofa.”
^ Lit., “kwaiyet.”
^ Er “fayd weh.”
^ Er “mek myoozik fi.”
^ Er “laayal lov.” Si di Glasari, “Laayal lov.”
