Saam 21:1-13
Dis da fi di dairekta. Dis da Dayvid sang.
21 Oa Jehoava, di king rijais bikaaz yu soh powaful;Yes! Hihn soh hapi bikaaz a how yoo sayv ahn!
2 Yu mi giv ahn weh ih haat dizaiya,Ahn yu neva hoal bak di tingz weh ih aks fa. (Seela)
3 Yu giv ahn lata wandaful blesinz;Yu put wahn krong weh mek owta pyoar goal pan ih hed.
4 Hihn aks yu fi ad moa dayz tu ih laif, ahn yu giv it tu ahn,Yu giv ahn wahn lang laif, fi liv fareva an eva.
5 Hihn geh lata prayz wen yu sayv ahn.
Yu poar aana ahn gloari pan ahn.
6 Yu mek hihn ga blesinz weh laas fareva;Yu mek ih feel lata jai wen ih deh wid yu.
7 Di king put ih chros eena Jehoava,Ahn bikaaz a dat notn wahn eva shayk ahn, kaaz di Moas Hai ga lata lov* far ahn.
8 Yu han wahn fain aala yu enimi dehn,Yu powaful rait han wahn fain dehn wan weh hayt yu.
9 Wen yu ton yu atenshan tu dehn, yu wahn dischrai dehn laik if yu di chroa dehn eena di faiya.
Jehoava wahn dischrai dehn eena ih anga, ahn faiya wahn eet dehn op.
10 Yu wahn dischrai fi dehn disendant dehn fahn aafa di ert;Yu wahn dischrai aala fi dehn pikni.
11 Dehn chrai fi du wikid tingz gens yu;Dehn mek planz weh noh wahn ton owt gud.
12 Yu wahn mek dehn ton rong ahn ron wehWen yu aym yu boa an aro* aata dehn.*
13 Oa Jehoava, get op ahn shoa yu schrent.
Wi wahn sing* fi prayz yu grayt powa.
Futnoat
^ Er “ga laayal lov.” Si di Glasari, “Laayal lov.”
^ Lit., “boa schring.”
^ Lit., “dehn fays.”
^ Er “sing ahn mek myoozik.”
