Saam 22:1-31
Wahn noat fi di dairekta: Play dis sang tu di choon a “Di Erli Maanin Dyaa.”* Dis da Dayvid sang.
22 Mai Gaad, mai Gaad, wai yu abandan mi?
Wai yu noh kohn sayv mi?
Ah di krai fi help bot yu deh soh faar fahn mi.
2 Mai Gaad, Ah kip di hala fi yu aal day lang, bot yu noh ansa mi.
An aal nait lang, Ah noh kip kwaiyet.
3 Bot yoo hoali,An Izrel sorong yu wid prayz.
4 Fi wee ansestaz mi put dehn chros eena yoo;Dehn mi ga chros, ahn yoo kip di sayv dehn.
5 Dehn mi krai owt tu yu fi help, ahn yu sayv dehn;Dehn mi chros eena yoo, ahn yu neva let dehn dong.*
6 Peepl skaan mi* ahn dehn hayt mi;Dehn chreet mi laik if Ai da wahn werm ahn noh wahn man.
7 Evribadi weh si mi mak mi;Dehn shayk dehn hed ahn mek fon a mi:
8 “Hihn chros eena Jehoava. Mek Hihn reskyu ahn!
Mek Hihn sayv ahn sins Ih lov ahn soh moch!”
9 Yoo da-mi di wan weh bring mi owta mi ma woom,Di wan weh mi mek Ah feel sayf pahn mi ma bres.
10 Fan Ah baan dehn chros yoo fi tek kayr a mi;Fahn wen Ah mi deh eena mi ma woom, yoo da-mi mai Gaad.
11 Pleez noh stay faar fahn mi, kaaz chrobl deh kloasAn Ah noh ga nobadi els fi help mi.
12 Lata yong bul di sorong mi;Lata powaful bul fahn Bayshan deh aal rong mi.
13 Laik wahn laiyan weh di roar ahn weh tayr ih viktim tu peesiz,Mi enimi dehn oapm dehn mowt waid fi atak mi.
14 Aala mi schrent poar owta mi laik waata;Aala mi boan dehn deh owta plays.
Mi haat da laik waks now;Ih melt deep eensaida mi.
15 Mi schrent jrai op laik wahn pees a klay pat;Mi tong stik tu mi gom;Yu kehr mi tu di pit fi mek Ah ded.
16 Mi enimi dehn sorong mi laik loan daag;Ahn laik wahn laiyan dehn di atak mi han ahn mi fut,Dehn krowd op rong mi laik wahn bonch a wikid peepl.
17 Ah ku konk aala mi boan dehn.
Mi enimi dehn wach mi ahn stayr pahn mi.
18 Dehn shayr op mi kloaz monks dehnself,Dehn chroa lats* fi si hoo wahn get mi kloaz.
19 Bot yoo, Oa Jehoava, noh stay faar fahn mi.
Mai schrent kohn fahn yoo; hori kohn help mi.
20 Sayv mi* fahn di soad.
Sayv mi preshos laif* fahn di daag dehn klaa;*
21 Sayv mi fahn di laiyan mowt ahn fahn di bul dehn haan;Ansa mi ahn sayv mi.
22 Ah wahn mek mi bradaz noa yu naym;An Ah wahn prayz yu eena di midl a di kangrigayshan.*
23 Evribadi weh ga rispek fi* Jehoava, unu prayz ahn!
Aala Jaykob disendant dehn, unu giv ahn gloari!
Aala Izrel disendant dehn, unu ga rispek far ahn* bikaaz hihn soh amayzin.
24 Hihn si di persn weh adaz chreet eena wahn kruwil way; ih si humoch ih sofa an ih noh ignoar ahn.
Ih noh haid ih fays fan ahn.
Wen ih mi krai owt tu ahn fi help, ih hyaa ahn.
25 Ai wahn prayz yu eena di big kangrigayshan;Ah wahn pay aala mi vow tu yoo fronta dehn wan weh rispek* yu.
26 Di wan dehn weh hombl wahn eet ahn geh satisfai;Di wan dehn weh di saach fi Jehoava wahn prayz ahn.
Ah hoap unu injai laif* fareva.
27 Evribadi pahn di ert wahn rimemba Jehoava ahn ton tu ahn.
Evri famili fahn di nayshan dehn wahn bow dong fronta ahn.
28 Bikaaz onli Jehoava ga di rait fi rool az king;Hihn rool oava di nayshan dehn.
29 Aala dehn wan pahn di ert weh ga sokses* wahn eet ahn wahn bow dong tu ahn;Aala dehn wan weh gwehn dong tu di pit wahn neel dong fronta ahn;Nat wan a dehn ku sayv dehn oan laif.*
30 Fi dehn disendant dehn wahn serv ahn;Di neks jenarayshan wahn hyaa bowt Jehoava.
31 Dehn wahn kohn taak bowt ih raichosnis.
Dehn wahn tel di peepl weh noh eevn baan yet bowt evriting weh hihn don du.
Futnoat
^ Dis di rifaa tu wahn feemayl dyaa. Aalso, dis taitl ku bee wahn choon er wahn stail a myoozik.
^ Er “neva shaym dehn.”
^ Er “shaym a mi.”
^ Si di Glasari, “Lats.”
^ Er “mi soal.” Si di Glasari, “Soal.”
^ Lit., “mi onli wan.” Dis di rifaa tu ih soal er laif.
^ Lit., “han.”
^ Si di Glasari, “Kangrigayshan.”
^ Er “weh fyaa.”
^ Er “unu fi fyaa ahn.”
^ Lit., “fyaa.”
^ Lit., “Ah hoap unu haat liv.”
^ Lit., “weh fat.”
^ Er “soal.”
