Saam 34:1-22
Dayvid mi rait dis sang afta ih mi priten fi bee krayzi fronta Abimelek, hoo mi chays ahn weh.
א [Aleph]*
34 Ah wahn prayz Jehoava aal di taim;Ah wahn aalwayz yooz mi mowt fi prayz hihn.
ב [Beth]
2 Ai* wahn boas bowt Jehoava;Dehn wan weh hombl wahn hyaa ahn rijais.
ג [Gimel]
3 Gi Jehoava gloari lang wid mi,Mek wi prayz ih naym tugeda.
ד [Daleth]
4 Ah pray tu Jehoava an ih ansa mi.
Hihn sayv mi fahn aala di tingz weh mek Ah feel frayd.
ה [He]
5 Dehn wan weh luk tu hihn wahn lait op wid jai;Dehn wahn neva luk shaym.
ז [Zayin]
6 Yoo hyaa wen wahn helples persn kaal owt tu yoo, Oa Jehoava.
Yu sayv ahn fahn aala ih chroblz.
ח [Heth]
7 Jehoava aynjel di kyamp aal rong dehn wan weh rispek* Ahn,An ih sayv dehn.
ט [Teth]
8 Gi Jehoava wahn chaans, ahn yu wahn si dat hihn gud;Di persn weh goh tu hihn fi shelta wahn bee hapi.
י [Yod]
9 Rispek* Jehoava, aala unu weh bilangz tu hihn,Bikaaz dehn wan weh rispek* ahn wahn aalwayz ga evriting weh dehn need.
כ [Kaph]
10 Eevn dehn laiyan weh yong ahn schrang* goh hongri,Bot dehn wan weh di saach fi Jehoava wahn neva ron owta gud tingz.
ל [Lamed]
11 Mi son, unu kohn ya ahn lisn tu mi;Ah wahn teech unu how fi rispek* Jehoava.
מ [Mem]
12 Wich wan a unu waahn injai laifAhn si lata hapi dayz?
נ [Nun]
13 Bee kyaaful dat unu* noh seh notn badAhn dat unu* noh tel no lai.
ס [Samekh]
14 Stap du weh bad ahn du weh gud;Saach fi pees ahn hoal aan tait tu it.
ע [Ayin]
15 Jehoava di wach oava dehn wan weh raichos,Ahn hihn lisn tu dehn wan weh di krai owt tu hihn fi help.
פ [Pe]
16 Jehoava ton ih fays gens dehn wan weh du bad,Hihn wahn mek shoar dat nobadi pahn di ert memba dehn.
צ [Tsade]
17 Di raichos wanz krai owt tu hihn, ahn Jehoava hyaa;Hihn sayv dehn fahn aala dehn chroblz.
ק [Qoph]
18 Jehoava kloas tu dehn wan weh di sofa eena dehn haat;Hihn sayv dehn wan weh diskorij.
ר [Resh]
19 Di raichos persn goh chroo lata haad taimz,*Bot Jehoava reskyu ahn fahn aala dehn.
ש [Shin]
20 Hihn di protek aala ih boan dehn;Non a ih boan dehn wahn eva brok.
ת [Taw]
21 Chroblz wahn kech di wikid ahn kil dehn;Dehn wan weh hayt raichos peepl wahn geh joj az gilti.
22 Jehoava sayv ih servant dehn laif;*Non a dehn weh goh tu hihn fi shelta wahn geh joj az gilti.
Futnoat
^ Dis da di fers leta a di Heebroo alfabet. Si di Glasari, “Akrostik stail.”
^ Er “Mi soal.” Si di Glasari, “Soal.”
^ Lit., “fyaa.”
^ Lit., “fyaa.”
^ Lit., “fyaa.”
^ Er “yong mayl laiyan.”
^ Lit., “fyaa.”
^ Lit., “unu tong.”
^ Lit., “unu lip.”
^ Er “sofarin.”
^ Er “soal.”
