Saam 35:1-28
Dis da Dayvid sang.
35 Oa Jehoava, difen mi fahn dehn wan weh deh gens mi;Fait gens dehn wan weh di fait gens mi.
2 Grab yu smaal sheel* ahn yu big sheel,Ahn get op fi difen mi, Oa Gaad.
3 Lif op yu aks ahn yu spyaa, ahn fait gens dehn wan weh di kohn afta mi.
Tel mi:* “Ai wahn sayv yu.”
4 Shaym dehn wan weh di plan fi kil mi.*
Mek dehn wan weh di plan fi kil mi ron weh eena shaym.
5 Mek dehn bee laik di chrash fahn di grayn weh di breez bloa weh;Mek yu aynjel chays dehn weh, Oa Jehoava.
6 Mek dehn road bee daak ahn slipriWail yu aynjel di chays afta dehn, Oa Jehoava.
7 Dehn set op wahn chrap fi kech mi fi no reezn;Fi no reezn dehn dig wahn pit fi kech mi.*
8 Ah hoap chrobl kech dehn bai sopraiz;Ah hoap dehn geh kech eena di chrap weh dehn set fi mi;Ah hoap dehn jrap een deh ahn ded.
9 Ah* wahn rijais sayka yoo, Oa Jehoava;Ah wahn bee hapi bikaaz yoo sayv mi.
10 Evri boan eena mi badi wahn seh:
“Oa Jehoava, dehn noh ga nobadi laik yoo.
Yu sayv di helples fahn dehn wan weh schranga dan dehn.
Yu sayv di helples ahn di poa fahn dehn wan weh teef fahn dehn.”
11 Peepl weh waahn hert mi kohn witnis gens mi.
Dehn klaym dat Ah du tingz weh Ah noh noa notn bowt.
12 Ah du gud tingz fi dehn bot dehn pay mi bak wid loan badnis.
Dehn mek Ah feel hoaples an emti eensaid.
13 Bot wen dehn mi geh sik, Ah put aan kloaz weh mek owta goat hyaa;*Ah hombl miself* di faas,Ahn wen Ah pray an Ah noh geh no ansa,
14 Ah waak bowt di moarn* laik how Ah wuda moarn fi mi fren er mi breda;Wid sadnis Ah bow dong laik wahn persn weh di moarn fi ih ma.
15 Bot wen Ah jrap dong, dehn kohn tugeda ahn rijais;Dehn kohn tugeda fi laywayt an atak mi;Dehn tayr mi tu peesiz ahn rifyooz fi stap.
16 Di peepl weh noh ga no kaina rispek fi yoo, Oa Gaad, hayt mi ahn tek mi mek papishoh,*Dehn geh beks bad wen dehn si mi.*
17 Oa Jehoava, how lang yu wahn jos lef dis fi hapm ahn noh du notn?
Sayv mi preshos laif* fahn di yong laiyan* dehn,Reskyu mi* soh dat dehn noh kil mi.
18 Den Ah wahn gi tanks tu yu eena di big kangrigayshan;*Ah wahn prayz yu monks di big krowd a peepl.
19 Noh mek dehn wan weh noh ga no reezn fi bee mi enimi laaf aata mi;Noh mek dehn wan weh hayt mi fi no reezn tek mi mek papishoh ahn wink dehn aiy aata mi.
20 Dehn noh taak bowt pees,Bot dehn di mek planz fi hert di peepl weh liv eena pees.
21 Dehn oapm dehn mowt waid fi blaym mi,Ahn dehn seh: “Ahaahn! Ahaahn! Wi si weh yu du.”
22 Oa Jehoava, yoo si weh hapm. Noh stay kwaiyet.
Oa Jehoava, pleez noh stay faar fahn mi.
23 Get op fi difen mi, Jehoava mi Gaad,Pleez difen mi eena mi leegal kays.
24 Oa Jehoava mi Gaad, joj mi akaadn tu yu raichosnis;Noh mek dehn laaf aata mi.
25 Pleez noh alow dehn fi seh: “Yes! Dis da egzakli weh wee mi waahnt.”*
Noh alow dehn fi seh: “Wi dischrai ahn.”
26 Mek aala dehn wan weh laaf aata mi chroblz luk shaym.
Ahn dehn wan weh tink dehn beta dan mee, kova dehn op wid shaym.
27 Bot mek dehn wan weh hapi dat Ah raichos showt wid jai;Mek dehn aalwayz seh:
“Prayz Jehoava, hoo hapi fi si ih servant di liv eena pees.”
28 Den Ai wahn taak bowt* yu raichosnis,An aal day Ah wahn prayz yu.
Futnoat
^ Di wan dehn weh yooz dis smaal sheel da di wan dehn weh yooz wahn boa an aro.
^ Er “mi soal.” Si di Glasari, “Soal.”
^ Er “mi soal.”
^ Er “mi soal.”
^ Er “Mi soal.”
^ Er “put aan sak klaat.” Si di Glasari, “Sak klaat.”
^ Er “mi soal.”
^ Si di Glasari, “Moarn.”
^ Dis ku aalso bee “Di peepl weh noh ga no kaina rispek fi Gaad tek mi mek papishoh fi wahn kayk.”
^ Lit., “Dehn grain dehn teet gens mi.”
^ Lit., “mi onli wan.” Dis di rifaa tu ih soal er laif.
^ Er “yong mayl laiyan.”
^ Er “mi soal.”
^ Si di Glasari, “Kangrigayshan.”
^ Er “Ahaahn! Dis da weh wi soal mi waahn.”
^ Er “meditayt pahn.”
