Saam 36:1-12
Dis da fi di dairekta. Dis sang da fahn Jehoava servant, Dayvid.
36 Sin taak tu wahn wikid persn fahn deep dong eensaida ih haat;Ih noh ga no kaina rispek* fi Gaad.
2 Bikaaz ih prayz op ihself soh moch,Ih kyaahn eevn si weh ih du rang an ih noh hayt di tingz weh ih du needa.
3 Di werdz weh kom owta ih mowt onli hert adaz ahn chrik dehn;Ih noh andastan how fi du weh gud.
4 Eevn wen ih di lidong pan ih bed, ih di plan fi du tingz weh bad.
Ih deh pahn wahn road weh noh gud;Ih noh rijek weh bad.
5 Oa Jehoava, yu lov* reech aal di way op tu di skai,Ahn yu laayalti reech aal di way op tu di klowdz.
6 Yu raichosnis da laik di mongtin dehn weh big ahn byootiful;*Yu jojment dehn da laik di deep see.
Oa Jehoava, yu tek kayr a* hyoomanz ahn di animal dehn.
7 Yu lov* soh preshos, Oa Gaad!
Peepl goh tek shelta eena di shado anda yu wing dehn.
8 Dehn jrink aala di gud tingz weh deh eena yu hows til dehn geh satisfai,Ahn yoo mek dehn jrink fahn owta yu riva a gudnis.
9 Yoo da di wan weh laif kohn fram;Bikaaz a yu lait wee ku si di lait.
10 Kantinyu shoa lov* tuwaadz dehn wan weh noa yu,Kantinyu shoa yu raichosnis tuwaadz dehn wan weh ga wahn pyoar haat.
11 Noh mek di peepl dehn weh prowd chrampl op pahn mi,Ahn noh mek di wikid jraiv mi weh wid dehn han.
12 Di wikid dehn jrap dong;Dehn geh nak dong ahn kyaahn get op.
Futnoat
^ Er “fyaa.”
^ Er “laayal lov.” Si di Glasari, “Laayal lov.”
^ Lit., “laik Gaad mongtin dehn.”
^ Er “sayv.”
^ Er “laayal lov.”
^ Er “laayal lov.”
