Saam 38:1-22
Dayvid sang, weh peepl fi memba.
38 Oa Jehoava, noh disiplin mi wail yu beks,Ahn noh karek mi wail yu ful a anga.
2 Bikaaz yu aro dehn schraik mi deep eensaid,Ahn yu han di pres dong haad pahn mi.
3 Mi hoal badi feel sik bikaaz a weh yu soh beks.
Ah kyaahn res sayka weh Ah sin.
4 Mi sin dehn pail op oava mi hed;Da laik wahn hevi load; da tu moch fi mek Ah handl.
5 Mi injri dehn stink an infektidBikaaz Ah du fool.
6 Ah dipres an Ah di sofa;Ah waak rong sad aal day.
7 Mi hoal badi feel sik;Ah feel laik Ah di bon op eensaid.
8 Ah feel nom an Ah noh ga no schrent;Di payn eena mi haat mek Ah groan wahn lat.
9 Oa Jehoava, yu noa aala mi dizaiya,Ahn yu noa aala mi sadnis tu.
10 Mi haat di beet faas, Ah looz aala mi schrent,An Ah eevn looz mi aiysait.
11 Mi fren dehn ahn di peepl weh Ah lov abandan mi bikaaz a mi sofarin,Ahn dehn wan weh kloas tu mi stay faar fahn mi.
12 Dehn wan weh waahn kil mi* set op sohn chrap fi mi;Dehn wan weh di chrai fi hert mi taak bowt how dehn waahn dischrai mi;Aal day dehn wispa lai bowt mi.
13 Bot Ah wahn bee laik sombadi weh def, an Ah noh wahn lisn;Ahn laik sombadi weh kyaahn taak, Ah noh wahn oapm mi mowt.
14 Ah geh fi bee laik wahn man weh kyaahn hyaa,Ahn weh kyaahn seh notn fi difen ihself.
15 Oa Jehoava, Ah mi-di wayt pahn yu,Ahn yoo ansa mi, Oa Jehoava mi Gaad.
16 Kaaz Ah seh tu miself: “Noh mek dehn rijais oava mi sofarin,An if Ah stombl noh mek dehn tink dehn beta dan mee.”
17 Bikaaz Ah mi-di luk fi jrap dong,Ahn mi payn dehn neva lef mi.
18 Ah mi kanfes mi sin;Mi sin mi-di taament mi.
19 Bot mi enimi dehn schrang* ahn maiti,Ahn now dehn ga wahn lata dehn weh hayt mi fi no reezn.
20 Ah du gud tingz fi dehn bot dehn pay mi bak wid loan badnis;Dehn chrai stap mi fahn kantinyu du weh gud.
21 Oa Jehoava, pleez noh abandan mi.
Oa Gaad, pleez noh stay faar fahn mi.
22 Oa Jehoava, mi sayvya,Pleez hori kohn help mi.
