Saam 39:1-13
Wahn noat fi di dairekta: Play dis sang eena di Jedooton* stail. Dis da Dayvid sang.
39 Ah seh: “Ah wahn bee kyaaful wid weh Ah duSoh dat Ah noh sin wid mi tong.
Az lang az dehn ga wikid peepl fronta mi,Ah wahn kova mi mowt ahn bee kyaaful wid weh Ah seh.”
2 Ah neva seh notn an Ah stay kwaiyet;Ah neva oapm mi mowt, nat eevn fi taak bowt gud tingz,Bot Ah mi feel lata payn.
3 Eensaida mi, mi haat geh hata ahn hata.
Ahn di moa Ah tink, di moa di faiya kantinyu fi bon.
Soh Ah seh:
4 “Oa Jehoava, help mi fi noa how Ah wahn ded,Ahn how lang Ah gat fi liv,Soh dat Ah ku noa how shaat mi laif.
5 Da chroo, yu onli gi mi wahn lee bit* a dayz;Ahn fronta yoo di lent a mi laif da notn.
Ah noa fi shoar dat evri man da jos wahn bret, noh mata how sayf ih feel. (Selah)
6 Fi shoar evri persn di waak rong laik wahn shado.
Dehn hasl dehnself* fi notn.
Dehn pail op richiz, ahn dehn nat eevn noa hoo wahn injai it.
7 Weh hoap Ah ku luk faawod tu, Oa Jehoava?
Yoo da mai onli hoap.
8 Sayv mi fahn aala mi sin dehn.
Noh mek dehn wan weh noh ga no sens tek mi mek papishoh.
9 Ah neva seh notn;Ah kudn oapm mi mowt,Aala dis mi hapm sayka yoo.
10 Tek weh di sofarin weh yu bring pahn mi.
Ah noh ga nohmoh schrent bikaaz yu ponish mi.
11 Yu ponish wahn persn weh sin fi karek ahn;Yu dischrai di tingz weh ih chrezha jos laik how wahn maat dischrai wahn klaat.
Ah noa fi shoar dat evri persn da jos wahn bret. (Selah)
12 Oa Jehoava, hyaa mi pryaa,Lisn tu mi wen Ah di krai fi help.
Pleez noh ignoar mi tyaaz.
Bikaaz tu yoo Ah da jos wahn farina,Wahn farina weh di paas chroo, jos laik mi ansesta dehn.
13 Ton weh yu anga fahn mi soh dat Ah ku bee hapiBifoa Ah ded ahn gaan.”
