Saam 41:1-13
Dis da fi di dairekta. Dis da Dayvid sang.
41 Wahn persn wahn bee hapi wen ih help dehn wan weh poa;Jehoava wahn reskyu ahn eena di day a dizaasta.
2 Jehoava wahn protek ahn an kip ahn alaiv.
Evribadi wahn si dat hihn hapi;Yoo wahn neva han ahn oava tu ih enimi dehn* fi mek dehn du wateva dehn waahn wid ahn.
3 Jehoava wahn help ahn wen ih deh eena ih bed sik;Ih wahn tek kayr a ahn joorin ih siknis.
4 Bikaaz Ah seh: “Oa Jehoava, pleez ga mersi pahn mi.
Heel mi,* bikaaz Ah sin gens yu.”
5 Bot mi enimi dehn taak bad bowt mi ahn seh:
“Da wen hihn wahn ded ahn da wen wi wahn stap hyaa fi hihn naym?”
6 Eevn if wan a dehn kohn vizit mi, da loan lai kom owta ih haat.
Ih lisn fi eniting weh ih ku yooz fi hert mi;Den ih goh owt ahn braadkyaas it aal oava.
7 Aal dehn wan weh hayt mi wispa monks dehnself bowt mi;Dehn di plan sohnting bad gens mi; dehn seh:
8 “Sohnting terabl hapm tu ahn;Now dat ih lidong sik eena ih bed, ih wahn neva geh beta.”
9 Eevn mi fren weh Ah chros,Hoo mi-di eet mi food, ton gens mi.
10 Bot yoo, Oa Jehoava, shoa mi mersi ahn lif mi op,Soh dat Ah ku pay dehn bak fi weh dehn du.
11 Wen mi enimi kyaahn ga vikchri oava mi ahn rijais,Den Ah wahn noa dat yu hapi wid mi.
12 Az fi mee, yu sopoat mi bikaaz Ah du weh rait;Yu wahn bee hapi wid mi fareva.*
13 Mek Jehoava, di Gaad a Izrel, geh aala di prayzFareva an eva.
Aymen an Aymen.
Futnoat
^ Lit., “enimi dehn soal.” Si di Glasari, “Soal.”
^ Er “mi soal.”
^ Lit., “Yu wahn kip mi fronta yu fareva.”
