Saam 42:1-11
Dis da fi di dairekta. Dis da Koara disendant dehn Maskil.*
42 Oa Gaad, Ah saach fi yoo jos laik wahn tersti dyaaWeh di saach fi wahn schreem a waata.
2 Yes, Ah tersti* fi Gaad, fi di livin Gaad.
Da wen Ah wahn ku kohn fronta Gaad?
3 Aal day an aal nait, mi onli food da-mi tyaaz;Aal day peepl mak mi ahn seh: “Da wehpaat yu Gaad deh?”
4 Ah yoostu waak wid wahn big krowd;Ah yoostu leed dehn tu Gaad hows,Wi mi rijais lang di way;Wi mi sing laik wahn krowd weh mi-di selibrayt wahn festival,Di sing sangz fi tank Gaad.
Ah memba aala dehnya tingz an Ah oapm mi haat* tu yu.
5 Wai Ah* feel soh sad?
Wai Ah di wori soh moch?
Wayt fi Gaad,Kaaz Ah wahn prayz ahn agen az mi Grayt Sayvya.
6 Mi Gaad, Ah* feel soh sad.
Dat da wai Ah di memba yu,Fahn di lan weh di Jaadn Riva ron ahn pahn tap a Mongt Hermon,Fahn Mongt Mizar.*
7 Ah hyaa di waata di floa faas ahn schrang,Da di song a di waata fahn yu waatafaal dehn.
Mi chroblz di jrongdid mi laik yu powaful wayv dehn.
8 Joorin di day, Jehoava wahn shoa mi lov.*
Ahn da nait, Ah wahn sing bowt ahn—wahn pryaa tu di Gaad weh gi mi laif.
9 Ah wahn aks Gaad, mi rak:
“Wai yu ferget mi?
Wai Ah haftu di waak bowt sad bikaaz mi enimi dehn chreet mi kruwil?”
10 Mi enimi dehn insolt mi eena wahn vailent ahn haytful way;*Aal day dehn mak mi ahn seh: “Da wehpaat yu Gaad deh?”
11 Wai Ah* feel soh sad?
Wai Ah di wori soh moch?
Wayt fi Gaad,Kaaz Ah wahn prayz ahn agen az mi Grayt Sayvya ahn mi Gaad.
Futnoat
^ Si di Glasari, “Maskil.”
^ Er “mi soal tersti.” Si di Glasari, “Soal.”
^ Er “soal.”
^ Er “mi soal.”
^ Er “mi soal.”
^ Er “di lee mongtin.”
^ Er “laayal lov.” Si di Glasari, “Laayal lov.”
^ Dis ku aalso bee “mak mi, ahn da laik if dehn di brok op mi boan dehn.”
^ Er “mi soal.”
