Saam 45:1-17
Wahn noat fi di dairekta: Play dis sang tu di choon a “Di Liliz.” Dis da Koara disendant dehn sang. Maskil.* Wahn lov sang.
45 Mi haat di oavafloa wid sohnting byootiful.
Ah seh: “Mi sang da bowt wahn king.”
Ah hoap mi tong wahn bee laik di pen weh wahn gud skraib* yooz.
2 Yoo da di moas hansom man eena di hoal werl.
Sweet werdz poar owta yu mowt.
Dat da wai Gaad wahn bles yu fareva.
3 Schrap yu soad tu yu ways, Oa maiti wan.
Yu jres op eena aana ahn gloari.
4 An eena aala yu gloari, kantinyu aan til yu geh di vikchri;*Raid yu haas ahn fait fi dehn wan weh hombl, fi chroot, ahn fi raichosnis.
Yu powaful rait han wahn du* amayzin tingz.
5 Yu aro dehn shaap, dehn goh schrayt chroo di haat a yu enimiz,Yu aro dehn mek di peepl dehn jrap fronta yu.
6 Gaad wahn bee yu chroan fareva an eva;Yu ga wahn rad weh wahn king yooz, ahn yu kingdom wahn rool wid jostis.
7 Yu lov raichosnis, ahn yu hayt wikidnis.
Dat da wai Gaad, hoo da fi yoo Gaad, anoint* yu wid ailAhn gi yoo moa jai dan aala di ada king dehn weh hihn anoint.
8 Aala yu kloaz smel a mer* an aloazwud ahn kasha;*Fahn di grayt aivri palis, di song a di haap* mek yu rijais.
9 Som a di anarabl wuman dehn eena yu palis da di king dehn daata.
Di kween jres op eena goal fahn Oafer, an ih di stan op pahn yu rait han said.
10 Lisn, mi daata, lisn tu mi ahn pay atenshan tu weh Ah ga fi seh;Ferget bowt yu peepl ahn yu pa famili.
11 Yu byooti mek di king ga wahn schrang dizaiya fi yoo.
Hihn da yu laad,Soh bow dong tu ahn.
12 Di daata a Taiya wahn bring wahn gif;Di richis man dehn wahn chrai haad fi pleez yu.
13 Di king daata deh eensaida di palis,* ahn shee soh byootiful;Fi shee kloaz dekorayt op wid goal.
14 Dehn wahn bring ahn fronta di king eena byootiful kloaz.
Dehn wahn bring ih verjin frenz weh di fala ahn fronta yoo.
15 Dehn wahn goh eena di king palis;Dehn wahn kom een di rijais, ahn dehn wahn bee hapi.
16 Yu son dehn wahn tek di plays a yu ansestaz.
Yu wahn apoint dehn az prins oava di hoal ert.
17 Ah wahn mek evri jenarayshan noa bowt yu naym.
Dat da wai peepl wahn prayz yu fareva an eva.
Futnoat
^ Si di Glasari, “Maskil.”
^ Si di Glasari, “Skraib.”
^ Er “ga sokses.”
^ Lit., “teech yu.”
^ Si di Glasari, “Anoint.”
^ Si di Glasari, “Mer.”
^ Si di Glasari, “Kasha.”
^ Er “inschrument dehn weh ga schring.”
^ Lit., “eensaid.”
