Saam 48:1-14
Dis da Koara disendant dehn sang.
48 Jehoava wandaful an onli hihn dizerv aala di prayzEena di siti a wi Gaad, eena fi hihn hoali mongtin.
2 Mongt Zaiyan deh faar op naat, dis da di siti a di Grayt King;Ih soh byootiful bikaaz ih stan op taal,Ih bring jai tu di hoal ert.
3 Eena di schrang towa a di siti,Gaad mek dehn noa dat dehn ku goh tu hihn fi protekshan.
4 Bikaaz wach deh! Di king dehn gyada tugeda;Dehn kohn tugeda fi fait gens dis siti.
5 Wen dehn si di siti, dehn mi sopraiz.
Dehn staat panik ahn ron weh bikaaz dehn soh fraitn.
6 Dehn staat tu chrimbl,Dehn staat tu skreem ahn krai owt laik wahn wuman weh di gi bert.
7 Di Tarshish ship dehn brok op wid jos di breez weh yu sen fahn di ees.
8 Now wi geh fi si fi wiself di tingz weh wi hyaa bowtEena di siti a Jehoava di Komanda a di hevnli aamiz, eena di siti a wi Gaad.
Gaad wahn mek it schrang fareva. (Seela)
9 Eensaida yu templ, Oa Gaad,Wi tink bowt yu lov.*
10 Jos laik yu naym, Oa Gaad, di prayz weh peepl gi yuReech tu evri kaana a di ert.
Yu rait han ful op a raichosnis.
11 Mek Mongt Zaiyan rijais.
Mek Jooda tong* dehn bee hapi bikaaz a yu jojment dehn.
12 Maach rong Zaiyan; maach aal rong it,Ahn konk ih towa dehn.
13 Tek wahn gud luk pan ih schrang waal dehn.
Inspek ih schrang towa dehn,Soh dat yu ku tel di neks jenarayshan dehn bowt it.
14 Bikaaz dis Gaad da fi wee Gaad fareva an eva.
Hihn wahn neva stap gaid wi.*
Futnoat
^ Er “laayal lov.” Si di Glasari, “Laayal lov.”
^ Lit., “daata.”
^ Dis ku aalso bee “Hihn wahn gaid wi til wi ded.”
