Saam 49:1-20
Dis da fi di dairekta. Dis da Koara disendant dehn sang.
49 Aala unu peepl, lisn tu dis.
Evribadi fahn rong di werl,* unu pay atenshan tu dis.
2 Yes, dis da fi evribadi, weda unu rich er poa,Fahn di moas impoatant tu di lees impoatant.
3 Waiz werdz wahn kom owta mi mowt;Di tingz weh Ah di tink bowt deep eensaid wahn shoa andastandin.
4 Ah wahn pay atenshan tu wahn praverb;An Ah wahn tel mi ridl wail Ah di play di haap.
5 Wai Ah shuda frayd wen chrobl kom,Wen peepl weh di chrai geh rid a mi sorong mi wid dehn wikidnis?
6 Nat wan a dehn wan weh di put dehn chros eena dehn richizAhn weh boas bowt dehn lata richiz,
7 Kuda eva sayv wan a dehn bradaEr gi Gaad wahn ransom* far ahn;
8 Di ransom prais fi dehn laif* soh haiDat ih noh pasabl fi mek dehn pay it.
9 No, nat wan a dehn ku sayv fi dehn brada soh dat ih ku liv fareva ahn noh fays di pit.*
10 Hihn si dat eevn dehn wan weh waiz en op di ded;Dehn wan weh schupid ahn noh ga no sens en op di ded tu,Ahn dehn en op haftu lef dehn richiz bihain fi sohnbadi els.
11 Deep dong eensaid, dehn wish dat dehn hows wuda laas fareva,Dehn wish dat dehn tent wuda laas fi jenarayshan afta jenarayshan.
Dehn naym dehn lan afta dehnself.
12 Ih noh mata humoch aana wahn man gat, ih wahn stil ded;Hihn noh eni beta dan di animal dehn weh ded.
13 Dis da weh wahn hapm tu dehn wan weh schupidAhn tu peepl weh fala dehn, weh laik hyaa wen dehn taak, eevn doa dehn werdz noh meen notn. (Seela)
14 Dehn wahn ded jos laik sheep weh dehn kehr fi slaata.*
Det wahn bee dehn shepad;Eena di maanin, di raichos wanz wahn rool oava dehn.
Dehn wahn disapyaa, no paat a dehn wahn lef bihain;Insteda wahn palis, di Grayv* wahn bee dehn hows.
15 Bot Gaad wahn sayv mi soh dat di Grayv noh ga no powa oava mi,Hihn wahn pul mi owt fahn deh. (Seela)
16 Soh noh geh frayd bikaaz wahn man geh rich,Bikaaz ih hows di geh moa ahn moa fansi,
17 Kaaz wen hihn ded, ih kyaahn kehr notn wid ahn;Ih kyaahn kehr ih richiz wid ahn.
18 Kaaz aal chroo ih laif ih big op ihself.
(Peepl prayz yu wen yu praspa.)
19 Bot jos laik ih ansesta dehn, ih wahn en op di ded.
Dehn wahn neva si di lait agen.
20 Eevn if wahn persn ga aana, an ih stil noh andastan dis,Den ih noh eni beta dan di animal dehn weh ded.
Futnoat
^ Er “fahn di sistem a tingz.”
^ Si di Glasari, “Ransom.”
^ Er “soal.” Si di Glasari, “Soal.”
^ Er “grayv.”
^ Lit., “tu di Grayv,” weh da Sheeyol. Si di Glasari, “Grayv.”
^ Er “Sheeyol,” weh da di Grayv. Si di Glasari, “Grayv.”
