Saam 5:1-12
Inschrokshan fi di persn weh tek di leed eena di myoozik fi di Neehilot.* Dis da Dayvid sang.
5 Oa Jehoava, pleez lisn tu weh Ah wahn seh;Andastan mi sadnis.
2 Oa mi King ahn mi Gaad,Pleez lisn tu mi wen Ah krai owt tu yu fi help,Bikaaz Ah di pray tu yoo.
3 Oa Jehoava, Ah noa yu wahn lisn tu mi pryaa eena di maanin;Eena di maanin Ah wahn tel yu how Ah feelAn Ah wahn wayt fi mek yu ansa mi.
4 Yoo da noh wahn Gaad weh feel hapi wen peepl du wikid tingz;Nobadi weh du bad tingz ku stay wid yu.
5 Nobadi weh prowd ku stan op fronta yu.
Yoo hayt enibadi weh du wikid tingz.
6 Yoo wahn dischrai enibadi weh laik tel lai.
Oa Jehoava, yoo hayt peepl weh vailent* ahn weh chrik adaz.
7 Ahn bikaaz yu lov mi wahn lat,* Ah ku goh eena yu hows;Ah wahn bow dong fronta yu hoali templ bikaaz Ah ga lata rispek fi yu.
8 Oa Jehoava, yoo raichos,Soh leed mi bikaaz Ah ga lata enimi rong mi;Help mi fi waak eena yu way soh dat Ah noh jrap dong.
9 Ah kyaahn chros notn weh dehn seh;Da loan wikidnis deh eena dehn haat.
Dehn mowt da laik wahn oapm grayv,Ahn di werdz weh kom owta dehn mowt fool op peepl.*
10 Bot yoo, Oa Gaad, wahn seh dat dehn gilti;Dehn oan planz wahn kaaz dehn fi dischrai dehnself.
Oa mi Gaad, pleez jraiv dehn weh fahn yuBikaaz a aala di bad tingz weh dehn duAhn bikaaz dehn ribel gens yu.
11 Bot enibadi weh goh tu yoo fi protekshan wahn bee hapi.
Dehn wahn sing owt lowd bikaaz dehn hapi.
Yu wahn protek dehn fahn peepl weh waahn hert dehn,Ahn dehn wan weh lov yu naym wahn bee hapi.
12 Oa Jehoava, yu wahn bles enibadi weh raichos.
Yu wahn shoa dat yu hapi wid dehn,Ahn yu wahn protek dehn jos laik how wahn big sheel gi protekshan.
Futnoat
^ Er “eena di Neehilot sang.” Si di Glasari, “Neehilot.”
^ Er “sombadi weh kil peepl.”
^ Er “bikaaz a yu laayal lov.” Si di Glasari, “Laayal lov.”
^ Er “Ahn dehn sweet taak peepl.”
