Saam 51:1-19
Dis da fi di dairekta. Dis da wahn sang weh Dayvid mi rait afta di prafit Naytan gaahn taak tu ahn sayka weh ih mi ga seks wid Bat-sheeba.
51 Pleez ga mersi pahn mi, Oa Gaad, bikaaz a yu lov.*
Waip owt mi sin dehn bikaaz yu soh mersiful.
2 Wash weh di stayn fahn di mistayk weh Ah mek.
Waip weh mi sin soh dat Ah ku bee kleen.
3 Bikaaz Ah noa gud-wan evriting weh Ah mi du rang,Mi sin dehn aalwayz deh pahn mi main.
4 Ah du weh bad eena yu sait;Ah sin gens yoo—espeshali yoo.*
Soh dat da wai weh yu seh rait;Yu jojment karek.
5 Fan Ah baan Ah da wahn sina;Fahn mi ma geh pregnant wid mi Ah da wahn sina.
6 Yu hapi wen wahn persn ga wahn aanis haat;Teech mi fi ga wahn waiz haat.
7 Wash weh mi sin dehn wid hisop,* soh dat Ah ku bee kleen;Wash weh mi sin dehn, soh dat Ah ku bee kleen ahn wait laik snoa.
8 Pleez mek Ah rijais ahn feel hapi agen,Soh dat eevn di boan dehn weh yu krosh wahn ku rijais tu.
9 Pleez noh luk pahn* mi sin dehn,Ahn waip weh* aala mi mistayk dehn.
10 Pleez mek Ah ga wahn pyoar haat, Oa Gaad,Ahn gi mi di dizaiya fi aalwayz du weh rait.
11 Noh put mi wan said,Ahn noh tek weh yu hoali spirit fahn mi.
12 Gi mi bak di jai weh Ah mi feel wen yu sayv mi;Gi mi di dizaiya fi waahn obay yu.*
13 Ah wahn teech sinaz di way yu waahn dehn liv,Soh dat dehn ku kohn bak tu yoo.
14 Oa Gaad, di Gaad weh sayv mi, pleez noh mek Ah bee blodgilti,Soh dat Ah ku bee hapi fi anonks aala di gud tingz weh yu du.
15 Oa Jehoava, oapm mi mowt,Soh dat Ah ku prayz yu fronta evribadi.
16 Ah mi wahn aafa yu wahn sakrifais, bot dat da noh weh yu waahn;Yoo noh geh no jai fahn wahn bon aafrin.*
17 Gaad aksep di sakrifais dehn fahn sohnbadi weh sari fi di sin weh dehn komit.
Oa Gaad, yu noh wahn rijek* sohnbadi weh diskorij ahn weh feel payn deep eensaida dehn haat.
18 Owta di gudnis a yu haat, du gud tingz fi Zaiyan;Bil op bak Jeroosalem waal dehn.
19 Den yu wahn geh jai fahn di sakrifais dehn a di raichos persn,Di bon aafrin ahn di hoal aafrin;Den dehn wahn aafa op di bul dehn pahn yu alta.
Futnoat
^ Er “laayal lov.” Si di Glasari, “Laayal lov.”
^ Lit., “onli yoo.”
^ Si di Glasari, “Hisop plaant.”
^ Er “haid yu fays fahn.”
^ Er “An irays.”
^ Er “Ah hoap yu sopoat mi ahn gi mi wahn wilin spirit.”
^ Si di Glasari, “Bon aafrin.”
^ Er “hayt.”
