Saam 55:1-23
Wahn noat fi di dairekta: Perfaam dis sang wid di inschrument dehn weh ga schring. Maskil.* Dis da Dayvid sang.
55 Oa Gaad, hyaa mi pryaa.
Ah di bayg yu fi mersi, pleez noh ignoar mi.*
2 Pleez pay atenshan tu mi an ansa mi.
Ah kyaahn sleep da nait bikaaz a mi woriz.
Ah feel angshos
3 Bikaaz a di tingz weh di enimi di sehAhn bikaaz wikid peepl di chreet mi eena wahn kruwil way.
Dehn di kaaz wahn lata chrobl fi mi;Dehn beks bad wid mi, ahn dehn onli hayt mi.
4 Ah feel payn eena mi haat,An Ah frayd fi ded.
5 Ah soh frayd dat Ah di chrimbl anaal;Ah kyaahn stap chrimbl.
6 Ah kip di seh: “Ah wish Ah mi ga wingz laik wahn dov!
Den Ah wuda flai weh ahn goh sohnweh sayf.
7 If da mi onli soh! Ah wuda flai faar fahn ya.
Den Ah wuda liv eena di wildanes.* (Seela)
8 Ah wuda hori fi goh tek sheltaSoh dat Ah ku eskayp di schrang breez, eskayp di staam.”
9 Kanfyooz dehn op, Oa Jehoava, ahn mes op dehn planz,Bikaaz Ah mi si dat di peepl eena di siti vailent bad ahn stay di fait monks eech ada.
10 Day ahn nait dehn waak rong tap a di siti waal dehn;Di siti ful op a haychrid ahn wikidnis.
11 Chrobl deh eena di hoal siti;Eena di ayrya wehpaat peepl gyada tugeda, dehn chreet di peepl dehn kruwil.
12 Ah kuda put op wid wahn enimi weh di insolt mi,Ah kuda eevn haid fahn mi enimi weh redi fi fait gens mi,Bot Ah noh di deel wid wahn enimi;
13 Da yoo, wahn man jos laik mee,Sohnbadi weh Ah noa gud, mai oan fren.
14 Di taim wi yoostu spen tugeda az kloas frenz mi speshal;Wi yoostu waak lang wid di krowd tu di plays wehpaat wi wership Gaad.
15 Ah hoap mi enimi dehn geh dischrai!
Sen dehn dong da di Grayv* alaiv;Bikaaz dehn wikid ahn loan wikidnis deh monks dehn.
16 Az fi mee, Ah wahn kaal owt tu Jehoava,An ih wahn sayv mi.
17 Ah wori ahn groan hoal day, fahn di taim di son kom op til eena di eevnin,An ih hyaa mi vais.
18 Hihn wahn sayv mi fahn dehn wan weh di fait gens mi, an ih wahn gi mi pees,Bikaaz dehn ga lata peepl weh deh gens mi.
19 Gaad, di wan weh di sidong pahn di chroan fahn lang taim,Wahn hyaa mi an ih wahn stan op gens dehn, (Seela)
Bikaaz dehn rifyooz fi chaynj;Dehn noh ga no kaina rispek fi Gaad.
20 Ih* mi atak dehn wan weh mi ga pees wid ahn;Ih brok di kovenant* weh ih mi mek wid mi.
21 Ih werdz saaf laik bota, ih eezi fi lisn tu ahn,Bot ih haat ful op a hayt.
Ahn jos laik smood ail, ih werdz song jentl ahn kain.
Bot reeli, dehn shaap laik wahn soad.
22 Chroa yu woriz pahn Jehoava,Ahn hihn wahn schrentn yu.
Hihn wahn neva mek wahn raichos persn faal dong.
23 Bot yoo, Oa Gaad, wahn sen dehn dong tu di deepis pit.
Dehn man deh blodgilti ahn dehn onli chriki; dehn laif wahn geh kot shaat.
Bot az fi mee, Ai wahn put mi chros eena yoo.
Futnoat
^ Si di Glasari, “Maskil.”
^ Er “Noh haid fahn mi wen Ah pray fi help.”
^ Si di Glasari, “Wildanes.”
^ Er “Sheeyol,” weh da di Grayv. Si di Glasari, “Grayv.”
^ Dis di rifaa tu di persn eena vers 13 ahn 14 weh yoostu bee ih fren.
^ Si di Glasari, “Kovenant.”
