Saam 56:1-13
Wahn noat fi di dairekta: Play dis sang tu di choon a “Di Kwaiyet Dov Weh Deh Faar.” Dis da Dayvid sang. Miktam.* Hihn mi rait dis sang afta di Filisteen dehn kyapcha ahn da Gat.
56 Ga mersi pahn mi, Oa Gaad, bikaaz peepl di atak mi.
Dehn kip di fait gens mi ahn chreet mi kruwil aal day lang.
2 Aal day mi enimi dehn fain reezn fi atak mi;Wahn lata peepl weh ful a dehnself kohn fait gens mi.
3 Wen Ah feel frayd, da yoo Ah put mi chros eena.
4 Ah prayz yu bikaaz a weh yu pramis, Oa Gaad,Da yoo Ah put mi chros eena; Ah noh feel frayd.
Da weh enibadi ku du tu mee?
5 Aal day lang dehn kaaz chrobl fi mi;Aal day lang dehn tink bowt wayz fi hert mi.
6 Dehn haid ahn wayt fi atak mi.
Dehn di luk fi di perfek chaans fi kil mi,*Soh dehn di wach evri lee ting weh Ah du.
7 Ponish dehn fi dehn wikidnis.
Shoa dehn dat yu beks, Oa Gaad, ahn ponish di nayshan dehn.
8 Yoo noa aal di sofarin weh Ah gaahn chroo wen Ah mi deh pahn di ron.
Pleez kalek op aal mi tyaaz ahn put dehn eena yu leda bag.*
Ah noa dat yu konk aala dehn ahn rait dehn dong eena yu buk.
9 Wen di day kohn wen Ah krai owt tu yu fi help, mi enimi dehn wahn ton bak ahn ron weh.
Ah kanfident dat Gaad deh wid mi.
10 Ah prayz yu bikaaz a weh yu pramis, Oa Gaad.
Oa Jehoava, Ah prayz yoo bikaaz a weh yu pramis.
11 Da yoo Ah put mi chros eena; Ah noh feel frayd.
Da weh enibadi ku du tu mee?
12 Mi Gaad, Ah haftu kip mi pramis dehn weh Ah mi mek tu yoo.
Ah wahn shoa yu tanks eena difrent wayz.
13 Bikaaz yu sayv mi laif*Ahn protek mi soh dat Ah noh jrap dong,Fi mek Ah ku kantinyu waak fronta yoo, Oa Gaad, eena di lait weh shain pahn dehn wan weh alaiv.
Futnoat
^ Si di Glasari, “Miktam.”
^ Er “mi soal.” Si di Glasari, “Soal.”
^ Lit., “skin batl.” Si di Glasari, “Skin batl.”
^ Er “mi soal.”
