Saam 57:1-11
Wahn noat fi di dairekta: Play dis sang tu di choon a “Noh Dischrai Mi.” Dis da Dayvid sang. Miktam.* Hihn rait dis sang afta ih ron weh fahn Saal ahn gaahn haid eena di kayv.
57 Ga mersi pahn mi, Oa Gaad, ga mersi pahn mi,Bikaaz Ai kohn tu yoo fi tek shelta.
Ah tek shelta eena di shado anda yu wing dehn til di daynja paas.
2 Ai kaal pahn di Moas Hai Gaad,Pahn di chroo Gaad, di wan weh put wahn en tu aala mi prablemz.
3 Hihn wahn help mi fahn op da hevn ahn sayv mi.
Hihn noh wahn mek dehn wan weh di atak mi ga sokses. (Seela)
Hihn wahn bee laayal tu mi ahn shoa mi lov.*
4 Peepl weh da laik laiyan sorong mi;Eevn wen Ah lidong fi sleep, Ah deh monks peepl weh da laik wail animal weh waahn eet mi op.
Dehn teet da laik spyaa an aroAhn dehn tong shaap laik wahn soad.
5 Oa Gaad, yoo haiya dan hevn;Mek di hoal ert si yu gloari.
6 Dehn set op wahn chrap fi kech mi;Ah soh schres owt ahn da tu moch fi bayr.
Dehn dig wahn pit fi chrap mi,Bot dehn jrap eena di saym pit weh dehn dig. (Seela)
7 Ai laayal tu yoo, Oa Gaad,Ai laayal tu yoo.
Ah wahn sing ahn mek myoozik.
8 Ah wahn wayk op.
Ah wahn wayk op bifoa di son kom op.
Ah waahn play di haap an ada inschrument weh ga schring.
9 Ah wahn prayz yoo fronta evribadi, Oa Jehoava;Ah wahn mek myoozik fi prayz yu fronta di nayshan dehn.
10 Bikaaz fi yoo lov* reech aal di way op tu di skai,Ahn yu laayalti reech aal di way op tu di klowdz.
11 Oa Gaad, yoo haiya dan hevn;Mek di hoal ert si yu gloari.
Futnoat
^ Si di Glasari, “Miktam.”
^ Er “laayal lov.” Si di Glasari, “Laayal lov.”
^ Er “laayal lov.”
