Saam 58:1-11
-
Dehn ga wahn Gaad weh di joj di hoal ert
-
Wahn pryaa fi ponish wikid peepl (6-8)
-
Wahn noat fi di dairekta: Play dis sang tu di choon a “Noh Dischrai Mi.” Dis da Dayvid sang. Miktam.*
58 How unu wahn taak bowt raichosnis if unu stay kwaiyet?
Unu tink unu ku bee wahn fyaa joj?
2 Insted, unu kom op wid bad tingz eena unu haat,An unu spred loan vailens eena di lan.
3 Di wikid staat tu du weh bad* fahn dehn baan;*Dehn owta aada ahn laiyad fahn di taim dehn baan.
4 Dehn paizn da laik di paizn fahn wahn snayk;Dehn def laik di koabra weh rifyooz fi lisn.
5 Ih noh wahn lisn tu enibadi weh di chrai put wahn spel pan ahn,Noh mata how gud di spel.
6 Oa Gaad, nak di teet rait owta dehn mowt!
Oa Jehoava, brok di laiyan* dehn jaa!
7 Mek dehn disapyaa jos laik how di waata disapyaa wen di vali geh jrai op.
Mek Hihn geh ih boa redi ahn shoot dehn dong wid ih aro dehn.
8 Mek dehn bee laik wahn snayl weh di jrai op,*Laik wahn baybi weh baan ded ahn weh neva geh fi si di son.
9 Bifoa di brambl eevn heet op di pat,Gaad wahn mek wahn win staam bloa weh di green ahn di jrai brambl.
10 Wahn raichos persn wahn rijais bikaaz ih si how Gaad ponish di wikid;Ih fut wahn soak wid di wikid wan dehn blod.
11 Den peepl wahn seh: “Fi shoar, di raichos wan dehn wahn ga wahn riwaad.
Yes, dehn reeli ga wahn Gaad weh di joj di hoal ert.”
Futnoat
^ Si di Glasari, “Miktam.”
^ Er “Di wikid korop.”
^ Er “fahn eena di woom.”
^ Er “yong mayl laiyan.”
^ Lit., “weh melt weh az ih moov lang.”
