Saam 60:1-12
Wahn noat fi di dairekta: Play dis sang tu di choon a “Di Lili Weh Serv az Wahn Rimainda.” Miktam.* Dis da Dayvid sang. Yooz dis fi teech. Ih mi rait dis sang afta ih mi fait wid di peepl fahn Ayram-naharayim an Ayram-Zoaba, an afta Joawab mi kohn bak ahn kil 12,000 Eedomait eena di Saalt Vali.
60 Oa Gaad, yu mi rijek wi, ahn yu kanka wi.
Yu mi beks wid wi; bot now pleez tek wi bak!
2 Yu kaaz di ert fi shayk; yu brok it oapm.
Pleez fiks it bak, soh dat ih noh faal apaat.
3 Yu alow yu peepl fi goh chroo haad taimz.
Wi di stombl anaal sayka di wain weh yu gi wi fi jrink.
4 Gi* wahn signal tu dehn wan weh rispek* yu,Soh dat dehn ku ron weh ahn daj di aro. (Seela)
5 Sayv wi wid yu rait han an ansa wi pryaa,Soh dat yu ku sayv dehn wan weh yu lov.
6 Dis da weh di hoali Gaad seh:
“Ai wahn rijais, Ah wahn giv owt Sheekem az wahn inheritans,An Ah wahn divaid op di Sokot Vali.*
7 Gilyad ahn Manaaseh bilangz tu mee,An Eefrayim da laik wahn helmit fi mi hed;Ahn tu mee, Jooda da laik wahn rad weh wahn komanda yooz.
8 Moawab da laik wahn baysn fi wash mi fut eena.
Ah wahn chroa mi sandalz oava Eedom.
Ah wahn showt bikaaz Ah wahn ga vikchri oava Filistya.”
9 Hoo wahn help mi ga vikchri gens di siti weh di soaljaz sorong?*
Hoo gwehn wid mi goh fait gens Eedom?
10 Da noh yoo, Oa Gaad, di sayhn wan weh rijek wi,Fi wee Gaad, di sayhn wan weh stap goh owt wid wi aami?
11 Help wi wen wi di goh chroo chroblz,Bikaaz da loan ways a taim fi pen pahn hyoomanz fi chrai sayv wi.
12 Gaad wahn gi wi powa,Ahn hihn wahn chrampl op pahn wi enimi dehn.
Futnoat
^ Si di Glasari, “Miktam.”
^ Dis ku aalso bee “Yu don gi.”
^ Lit., “fyaa.”
^ Er “di Loa Lan a Sokot.”
^ Dis ku aalso bee “di schrang siti.”
