Saam 62:1-12
Wahn noat fi di dairekta: Play dis sang eena di Jedooton* stail. Dis da Dayvid sang.
62 Ai di wayt pahn Gaad wid payshens.
Mai salvayshan kohn fahn hihn.
2 Hihn da mai rak ahn mai salvayshan, mai sayf plays;Notn wahn eva mek Ah stombl ahn jrap dong.
3 Fi how lang unu wuda atak sohnbadi if unu mi waahn kil ahn?
Aala unu daynjaros laik wahn waal weh di leen, laik wahn waal weh di luk fi jrap dong.
4 Unu kohn tugeda ahn taak bowt how fi bring ahn dong fan ih hai pozishan;Unu hapi fi tel lai.
Unu seh nais tingz wid unu mowt, bot eensaid unu wish bad far ahn. (Seela)
5 Ai di wayt pahn Gaad wid payshens.
Hihn da di wan weh gi mi hoap.
6 Hihn da mai rak ahn mai salvayshan, mai sayf plays;Notn wahn eva mek Ah stombl.
7 Mai salvayshan ahn mai gloari kohn fahn Gaad.
Gaad da mai schrang rak ahn mai shelta.
8 Mai peepl, unu put unu chros eena hihn aal di taim.
Poar owt unu haat tu ahn.
Gaad da wahn shelta weh wi ku goh tu. (Seela)
9 Hyoomanz da jos wahn bret.
Wen yu put aala dehn pahn wahn skayl, dehn noh way notn, dehn way eevn les dan ayaa.
Ih yoosles fi pen pahn dehn.
10 Noh di chretn peepl fi dehn moni er teef fahn dehn,Noh pen pahn dehndeh tingz fi geh rich.
Eevn if yu doo en op di geh richa, noh put yu chros eena it.
11 Too taimz Ah hyaa Gaad sehDat powa bilangz tu Gaad.
12 Oa Jehoava, yu shoa kainis,*Bikaaz yu pay bak eech persn fi di tingz weh ih du.
