Saam 64:1-10
-
Protekshan fahn sohn daynjaros chrap
-
“Gaad wahn shoot ih aro aata dehn” (7)
-
Dis da fi di dairekta. Dis da Dayvid sang.
64 Oa Gaad, hyaa mi vais az Ah di bayg yu fi help.
Pleez protek mi fahn di tingz weh mi enimi di seh fi chretn mi.
2 Protek mi fahn di planz weh wikid peepl mek eena seekrit;Protek mi fahn di krowd a peepl weh du bad tingz.
3 Dehn yooz dehn tong laik wahn shaap soad;Dehn aym dehn kruwil werdz jos laik aroz,
4 Fahn di plays weh dehn di haid, dehn shoot aata di inosent wan;Ahn dehn noh frayd; sodn-wan dehn shoot aata ahn.
5 Dehn rifyooz fi lef dehn wikid wayz;*Dehn taak bowt how fi haid dehn chrap dehn.
Dehn seh: “Nobadi wahn si dehn.”
6 Dehn kom op wid nyoo wayz fi du weh bad;Dehn plan owt weh dehn wahn du eena seekrit;Ih haad fi eevn imajin weh dehn di tink eena dehn haat.
7 Bot Gaad wahn shoot ih aro aata dehn,Ahn sodn-wan dehn wahn geh hert.
8 Dehn oan mowt* wahn get dehn eena chrobl;Evribadi weh di luk pahn dehn wahn shayk dehn hed aata dehn.
9 Dehn wahn si aal di tingz weh Gaad du ahn dehn wahn geh frayd,Ahn dehn wahn mek evribadi noa bowt it,Ahn dehn wahn andastan aal di tingz weh hihn du.
10 Di raichos wan dehn wahn rijais sayka Jehoava ahn goh tu hihn fi shelta;Evribadi weh du weh rait wahn feel jai sayka yoo.
