Saam 65:1-13
Dis da fi di dairekta. Dis da Dayvid sang.
65 Wi wahn prayz yu eena Zaiyan, Oa Gaad;Wi wahn du di tingz weh wi pramis yu.
2 Oa Gaad, di wan weh lisn tu pryaaz, aal kaina peepl wahn kohn tu yoo.
3 Mi mistayk dehn da tu moch fi mek Ah bayr,Bot yu kova oava wi sin dehn.
4 Di persn weh yu pik an invait fi kohn kloas tu yooFi liv eena yu koatyaad wahn bee hapi.
Wi wahn satisfai wid di gud tingz eena yu hows,Yu hoali templ.
5 Oa Gaad, wi sayvya,Yu wahn du tingz weh amayzin ahn raichos fi ansa wi pryaaz;Peepl fahn aal oava di ert wahn put dehn chros eena yoo,Eevn dehn wan weh liv faar kraas di see.
6 Wid yu powa, yoo set di mongtin dehn eena dehn plays;Yu jres op eena powa.
7 Yu kaam di see wen ih rof, wen di wayv dehn schrang,Ahn yu kaam di big komoashan monks di nayshan dehn.
8 Peepl weh liv eena sohn faar plays wahn bee sopraiz bikaaz a di amayzin tingz weh yu du;Fahn wehpaat di son raiz tu wehpaat di son set, yoo wahn mek di peepl dehn showt wid jai.
9 Yu tek kayr a di ert,Yu mek di soil rich ahn mek ih projoos lata tingz.
Di schreem fahn Gaad ful op wid waata;Yu pripyaa di ert eena wahn wayFi mek ih provaid grayn fi peepl.
10 Yu waata di feel dehn, ahn wid da waata yu levl aaf di feel weh geh plow;Yu saafn it wid rayn ahn yu bles it fi mek ih projoos lata tingz.
11 Eech yaa yoo provaid lata blesinz;Eniway wehpaat yoo goh, lata gud tingz deh.
12 Di paascha dehn eena di wildanes* di oavafloa wid green graas,Ahn di hil dehn ful op a jai.
13 Di paascha dehn ful op a sheep,*Ahn grayn kova op di vali* dehn laik wahn kyaapit.
Di hoal lan sing ahn showt owt wid jai.
