Saam 7:1-17
-
Jehoava da wahn raichos Joj
-
“Oa Jehoava, joj mi” (8)
-
Wahn sad sang weh Dayvid mi sing tu Jehoava bikaaz a di tingz weh Kush, hoo da wan a Benjamin disendant, mi seh.
7 Oa Jehoava mi Gaad, Ah goh tu yoo fi tek shelta.
Sayv mi fahn aal dehn wan weh di persikyoot mi ahn pleez reskyu mi.
2 If nat dehn wahn tayr mi op jos laik weh wahn laiyan wuda du,Ahn den jreg mi weh ahn nobadi wahn ku reskyu mi.
3 Oa Jehoava mi Gaad, if da mee deh eena di rang,If Ai mi ak eena wahn wikid way,
4 If Ah hert sohnbadi weh chreet mi gud,Er if Ah rayd mi enimi dehn fi no reezn,*
5 Mek mi enimi dehn chays mi dong ahn kech mi;Mek dehn stamp mi dong ahn lef mi pahn di grong fi ded;Mek dehn lef mi deh ahn mek mi aana disapyaa eena di dos. (Seela)
6 Oa Jehoava, get op ahn shoa yu anga;Stan op gens mi enimi dehn weh beks bad wid mi;Stan op fi mi, ahn mek shoar Ah geh jostis.
7 Mek di nayshan dehn sorong yu;Ahn fahn op da hevn, yu wahn goh gens dehn.
8 Jehoava wahn joj di nayshan dehn.
Oa Jehoava, joj mi ahn memba mi raichosnisAhn memba di gud tingz weh Ah du fi yu.
9 Pleez stap di wikid peepl fahn du eevl tingz.
Bot schrentn di wan dehn weh raichos,Bikaaz yoo da wahn raichos Gaad hoo saach chroo wi haat ahn noa how wi feel deep eensaid.*
10 Gaad da mai sheel; hihn sayv dehn wan weh ga wahn pyoar haat.
11 Gaad da wahn raichos Joj,Ahn Gaad joj wikid peepl evri day.
12 If dehn noh waahn ripent, Hihn shaapm ih soad;Ih haal bak ih boa an aro, an aym it aata dehn.
13 Hihn get ih powaful wepan dehn redi;Hihn lait op ih aro dehn wid faiya.
14 Luk pahn di wan weh pregnant wid wikidnis;Chrobl deh eena ih woom, an ih gi bert tu loan lai.
15 Hihn dig wahn pit az wahn chrap, wahn deep deep pit,Bot hihn jrap rait eena di saym pit weh ih dig.
16 Di chrobl weh ih kaaz wahn kohn bak pan ih oan hed,An ih vailens wahn kohn rait bak tu ahn.
17 Ai wahn prayz Jehoava fi ih jostis;Ai wahn mek myoozik fi prayz di naym a di Moas Hai Gaad Jehoava.
Futnoat
^ Dis ku aalso bee “Bot Ah spyaa di wan weh persikyoot mi fi no reezn.”
^ Er “hoo tes di haat ahn di kidni.”
