Saam 71:1-24
71 Oa Jehoava, da yoo Ah goh tu fi tek shelta.
Pleez noh mek Ah luk shaym.
2 Sayv mi ahn reskyu mi bikaaz yu raichos.
Pleez pay atenshan tu mi wen Ah krai owt tu yu fi help* ahn sayv mi.
3 Bee wahn schrang rak fi meeWeh Ah ku aalwayz ton tu.
Sen owt wahn koman fi sayv mi,Bikaaz yoo da mai rak ahn mai sayf plays.
4 Mi Gaad, sayv mi fahn di wikid wan weh di hoal aan tait tu mi,Fahn di wan weh di persikyoot mi ahn weh noh chreet mi fyaa, bikaaz Ah deh anda ih kanchroal.
5 Moas Hai Laad Jehoava, yoo da mi hoap;Fan Ah yong Ah put mi chros eena yoo.*
6 Ah pen pahn yoo fan Ah baan;Yoo da di wan weh tek mi owta mi ma woom.
Dats wai Ah prayz yu aal di taim.
7 Wahn lata peepl luk op tu mi,Bot yoo da mai schrang shelta.
8 Mi mowt ful op a werdz fi prayz yoo;Aal day lang, Ah taak bowt how yu soh amayzin.
9 Noh dash mi wan said wen Ah geh oal;Noh abandan mi wen Ah staat tu geh week.
10 Mi enimi dehn taak bad bowt mi;Ahn dehn ga sohn peepl weh kohn tugeda fi mek planz fi kil mi.
11 Dehn seh: “Gaad abandan ahn.
Chays ahn dong ahn kyapcha ahn, bikaaz ih noh ga nobadi fi kohn sayv ahn.”
12 Oa Gaad, noh stay faar fahn mi.
Mi Gaad, pleez hori kohn help mi.
13 Mek dehn wan weh deh gens miLooz dehn aana ahn geh dischrai.
Bring shaym ahn disrispek pahn dehn wan weh di luk fi kil mi.
14 Bot az fi mee, Ah wahn kip di wayt pahn yu;
Ah wahn prayz yu moa ahn moa.
15 Ah wahn yooz mi mowt fi taak bowt yu raichosnis,An aal day lang, Ah wahn taak bowt weh yu du fi sayv mi,Eevn doa da tu moch fi mek Ah konk.
16 Ah wahn tel evribadi bowt di powaful tingz weh yu du,Moas Hai Laad Jehoava,Ah wahn jos taak bowt fi yoo raichosnis, ahn nobadi els.
17 Oa Gaad, fan Ah yong yu di teech mi,An op tu now Ah kip di taak bowt di wandaful tingz weh yu du.
18 Oa Gaad, eevn wen Ah staat geh oal ahn ga gray hyaa, noh abandan mi.
Pleez mek Ah tel di neks jenarayshan bowt yu powa,Ahn mek Ah tel dehn wan weh wahn kohn eena di fyoocha bowt yu schrent.
19 Oa Gaad, yu raichosnis soh wandaful;Yoo du lata wandaful tingz;Oa Gaad, dehn noh ga nobadi laik yoo.
20 Eevn doa yu mek Ah gaahn chroo lata chrobl ahn sofarin,Pleez schrentn mi agen;Bring mi owta di deepis paat a di ert.*
21 Ah pray dat yu gi mi bak mi rispekAhn dat yu sorong mi ahn gi mi komfert.
22 Den Ah wahn play wahn inschrument* ahn sing fi prayz yuBikaaz yu laayal, Oa Gaad.
Ah wahn play di haap ahn sing fi prayz yoo,*Di Hoali Gaad a Izrel.
23 Wid lata jai, mi mowt wahn sing owt lowd fi prayz yu,Bikaaz yoo sayv mi laif.*
24 Aal day lang Ah wahn taak* bowt yu raichosnis,Bikaaz dehn wan weh di luk fi dischrai mi wahn geh shaym ahn looz dehn aana.
Futnoat
^ Er “Pleez ben dong ahn lisn tu mi.”
^ Er “yoo da mai kanfidens.”
^ Er “owta deep waata.”
^ Lit., “inschrument weh ga schring.”
^ Er “ahn mek myoozik fi yoo.”
^ Er “mi soal.” Si di Glasari, “Soal.”
^ Er “meditayt.”
