Saam 72:1-20
Wahn sang bowt Salaman.
72 Oa Gaad, gi di king yu laa dehn,Ahn help di king son fi du weh raichos jos laik yoo.
2 Mek ih difen yu peepl wid raichosnis,Ahn gi jostis tu yu peepl dehn weh poa.
3 Mek di mongtin dehn gi pees tu di peepl dehn,Ahn mek di hil dehn gi raichosnis tu di peepl dehn.
4 Mek ih difen dehn wan weh poa monks fi hihn peepl;Mek ih sayv dehn son dehn tu,Ahn mek ih dischrai di persn weh chrik dehn ahn teef fahn dehn.
5 Oa Gaad, dehn wahn rispek yuFi az lang az di son ahn di moon egzis,Fi jenarayshan afta jenarayshan.
6 Hihn wahn bee laik di rayn weh jrap pahn graas weh geh kot,Laik hevi rayn weh poar dong ahn waata di ert.
7 Joorin fi hihn taim, di raichos wan dehn wahn praspa,*Ahn fi az lang az di moon egzis, dehn wahn ga lata pees.
8 Hihn wahn rool fahn wan see tu di neks,Ahn fahn di Yoofraytis Riva tu di faardis paat a di ert.
9 Di peepl dehn weh liv eena di dezert wahn bow dong fronta hihn,An ih enimi dehn wahn lik di dos.
10 Tarshish king dehn ahn di king dehn weh rool oava di ailan dehn wahn pay ahn taks.
Ahn Seeba ahn Sheeba king dehn wahn giv ahn gif.
11 Aala di king dehn wahn bow dong fronta hihn,An aala di nayshan dehn wahn serv ahn.
12 Hihn wahn reskyu di poa wan dehn weh krai owt tu ahn fi help,Lang wid di hombl wan dehn ahn dehn wan weh noh ga nobadi fi help dehn.
13 Hihn wahn ga mersi pahn di hombl ahn poa wan dehn,An ih wahn sayv di poa wan dehn laif.*
14 Hihn wahn sayv dehn fahn peepl weh persikyoot dehn ahn chreet dehn vailent.
Tu hihn, fi dehn blod wahn bee preshos.
15 Ah hoap dat ih liv wahn lang laif ahn dat ih geh goal fahn Sheeba,Ah hoap dat peepl pray far ahn aal di taimAhn bles ahn aal day lang.
16 Dehn wahn ga lata grayn pahn di ert;Ih wahn oavafloa pahn di tap a di mongtin dehn.
Di king gyaadn dehn wahn bayr lata froot jos laik di chree dehn da Lebanon,Ahn di peepl eena di siti dehn wahn bee plenti laik di graas weh deh pahn di ert.
17 Ah hoap dat evribadi noa fi hihn naym ahn dat ih laas fareva;Ah hoap dat ih naym laas az lang az di son.
Ah hoap dat aala di peepl geh wahn blesin fahn hihn,Ahn dat aala di nayshan dehn wahn si dat hihn hapi.
18 Prayz Jehoava, di Gaad a Izrel;Hihn da di onli wan weh ku du wandaful tingz.
19 Mek dehn prayz fi hihn wandaful naym fareva,Ahn mek ih gloari ful op di hoal ert.
Aymen an Aymen.
20 Dis da di en a Dayvid pryaa. Hihn da Jesi son.
