Saam 73:1-28
Dis da Aysaf sang.
73 Gaad du gud tingz fi Izrel; hihn du gud tingz fi dehn wan weh ga wahn pyoar haat.
2 Ah nayli gaahn dong di rang road;Da mi laik if Ah aalmoas slip ahn jrap dong.
3 Kaaz Ah staat tu geh jelosWen Ah si how dehn wan weh wikid ahn boasi di praspa.
4 Kaaz dehn noh sofa eevn wen dehn di ded;Dehn schrang ahn helti.*
5 Dehn noh gat tingz haad laik ada peepl,Ahn dehn noh sofa laik how ada peepl sofa needa.
6 Dehn wayr dehn praid laik wahn chayn rong dehn nek;Dehn du soh moch vailent tingz dat ih kova dehn op laik kloaz.
7 Dehn fays soh fat dat ih mek dehn aiy smaal;Dehn ga way moa dan weh dehn kuda mi eva wish fa.
8 Dehn seh eevl tingz ahn tek peepl mek papishoh.
Dehn prowd fi chretn fi persikyoot peepl.
9 Dehn taak laik if dehn deh aal di way op da hevn;Dehn prans rong pahn di ert di seh wateva dehn waahnt.
10 Soh Gaad peepl ton rong ahn staat tu fala dehn,Ahn dehn jrink fahn di waata weh dehn provaid.
11 Wikid peepl aks: “Gaad noa weh di hapm?
Di Moas Hai reeli noa aal weh di hapm?”
12 Yes, wikid peepl aalwayz gat it eezi;Dehn kip di geh moa ahn moa rich.
13 Da mi fi notn Ah kip mi haat pyoar;Da mi fi notn Ah wash mi han fi shoa dat Ah inosent.
14 Ah mi ga prablemz aal day lang;Evri maanin Gaad wuda skoal mi.
15 Bot if Ah mi seh dehndeh tingz owt lowd,Den Ah mi wahn di bichray yu peepl.
16 Wen Ah chrai fi andastan wai aala dehnya tingz hapm,Ih bada mi wahn lat
17 Til Ah gaan eena Gaad wandaful hoali plays,An Ah fain owt weh wahn hapm tu dehn eena di fyoocha.
18 Fi shoar yu put dehn pahn wahn road weh slipri,Soh dat dehn faal dong ahn geh dischrai.
19 Kwik-wan dehn wahn geh dischrai!
Kwik-wan dehn wahn sofa ahn ded!
20 Ahn jos laik how sohnbadi ferget bowt wahn jreem afta dehn wayk op, Oa Jehoava,Da rait soh yoo wahn ferget bowt dehn* wen yoo get op.
21 Bot mi haat mi bita,Ahn deep eensaida mi,* Ah mi feel wahn shaap payn.
22 Ah neva mi-di tink schrayt, an Ah neva ga no andastandin;Ahn fronta yoo Ah gaan aan laik wahn animal weh ga no sens.
23 Bot now Ah deh wid yu aal di taim;Yu di hoal mi rait han.
24 Yu gi mi advais fi gaid mi,An aftawodz yu wahn gi mi gloari.
25 Da hoo els Ah ku pen pan eena hevn bisaidz yoo?
Az lang az Ai gat yoo, Ah noh need eniting pahn dis ert.
26 Mi badi ahn mi haat mait giv op pahn mi,Bot Gaad da di rak weh schrentn mi haat; hihn wahn aalwayz bee mai riwaad, fareva an eva.
27 Fi shoar dehn wan weh noh stay kloas tu yu wahn geh dischrai.
Yu wahn dischrai enibadi weh noh faytful tu yoo.*
28 Bot di bes ting fi mek Ah du da fi jraa kloas tu Gaad.
Ahn sins mai shelta da di Moas Hai Laad Jehoava,Ah wahn mek evribadi noa aal di tingz weh hihn du.
Futnoat
^ Er “Dehn beli big.”
^ Er “wahn rijek dehn imij.”
^ Lit., “eena mi kidni dehn.”
^ Er “weh goh aan laik wahn imoaral persn.”
