Saam 74:1-23
Dis da Aysaf Maskil.*
74 Oa Gaad, da weh mek yu ton yu bak pahn wi fareva?
Wai yu soh beks wid yu oan flak a sheep?*
2 Noh ferget di peepl weh yu mi pik fahn way bak,Di chraib weh yu mi sayv ahn tek az yu inheritans.
Noh ferget Mongt Zaiyan, di plays wehpaat yu mi liv.
3 Pay atenshan tu di rooinz weh aalwayz dehdeh.
Di enimi dischrai evriting weh deh eena di hoali plays.
4 Yu enimi dehn hala owt eena yu tabernakl.
Rait deh, dehn set op dehn oan sain.
5 Dehn da laik sohn man weh di swing dehn aks fi chap dong wahn tik faris.
6 Dehn brok op aala di dekorayshan eena di tabernakl wid sohn aks an aiyan baar.
7 Dehn bon op di tabernakl weh aana yu naym.
Dehn brok it dong, ahn dehn neva shoa no kaina rispek far it.
8 Dehn ahn fi dehn pikni seh tu dehnself:
“Wi wahn bon dong aala di plays dehn eena di lan wehpaat peepl meet op fi wership Gaad.”
9 Wi noh di si non a di sain dehn;Nohmoh prafit lef,Ahn non a wi noa how lang tingz wahn stay dis way.
10 Oa Gaad, how lang di enimi wahn kip di insolt yu?
How lang di enimi wahn kantinyu fi disrispek yu naym? Fareva?
11 Wai yu di hoal bak yu powaful rait han?
Tek yu han fahn owta yu roab ahn dischrai dehn.
12 Bot Gaad da mai King fahn way bak.
Hihn da di wan weh di du tingz fi sayv peepl pahn di ert.
13 Yu yooz yu schrent fi kanchroal di see.
Yu krosh di hed a di monsta dehn weh liv eena di see.
14 Yoo krosh di Levaiyatan* dehn hed,Ahn yu giv it tu di peepl dehn weh liv eena di dezert fi eet.
15 Yoo oapm op di grong fi mek di waata spring ahn schreem dehn floa;Yu jrai op di riva dehn weh aalwayz di ron.
16 Di day ahn di nait bilangz tu yoo;Yoo mek di son ahn di moon.
17 Yoo da di wan weh disaid how big di difrent paats a di ert fi bee;Yoo da di wan weh kriyayt soma ahn winta.
18 Noh ferget, Oa Jehoava, how yu enimi dehn insolt yu,How peepl weh noh ga sens noh shoa rispek fi yu naym.
19 Noh han oava yu dov tu di wail animal dehn.
Noh ferget yu peepl dehn weh di sofa.
20 Noh ferget di kovenant* weh yu mek wid wi,Bikaaz aala di daak plays weh deh pahn dis ert ful op a vailens.
21 Mek di wan weh di sofa noh lef fahn ya disapointid;Mek di wan weh poa prayz yu naym.
22 Get op, Oa Gaad, ahn difen yu leegal kays.
Noh ferget how dehn wan weh noh ga sens insolt yu aal day lang.
23 Noh ferget weh yu enimi dehn seh.
Dehn wan weh deh gens yu di mek naiz, an ih kantinyu fi goh aal di way op tu yoo.
Futnoat
^ Si di Glasari, “Maskil.”
^ Lit., “di flak a yu paascha.”
^ Si di Glasari, “Levaiyatan.”
^ Si di Glasari, “Kovenant.”
