Saam 77:1-20
Wahn noat fi di dairekta: Play dis sang eena di Jedooton* stail. Dis da Aysaf sang.
77 Ah wahn krai owt tu Gaad wid wahn lowd vais.
Ah wahn krai owt tu ahn, an hihn wahn hyaa mi.
2 Wen Ah di goh chroo chroblz Ah ton tu Jehoava.
Aal nait lang Ah schrech owt mi han tuwaadz hevn ahn pray.
Bot notn noh deh weh ku gi mi* komfert.
3 Ah feel sad wen Ah tink bowt Gaad;Ah di wori, ahn bikaaz a dat Ah feel week. (Seela)
4 Da laik yu di hoal oapm mi aiy dehn;Ah soh schres owt dat Ah kyaahn eevn taak.
5 Ah staat tu tink bowt di tingz weh hapm eena di paas,Di tingz weh hapm yaaz agoa.
6 Joorin di nait Ah memba mi sang;*Ah tink tu miself,An Ah saach fi wahn ansa tu dehnya kweschan:
7 Jehoava wahn dash wi wan said ahn lef wi deh fareva?
Hihn wahn eva bee hapi wid wee agen?
8 Fi hihn lov* gaan fareva?
Eni a di jenarayshan dehn wahn geh fi si fi hihn pramis kohn chroo?
9 Gaad ferget fi shoa ih mersi,Er ih stap shoa mersi bikaaz ih beks? (Seela)
10 Humoch langa Ah wahn haftu seh: “Dis da weh di mek Ah wori:
Di Moas Hai Gaad noh di sopoat wi nohmoh”?
11 Ah wahn rimemba di tingz weh Jah du;Ah wahn rimemba aala di wandaful tingz weh hihn du fahn way bak.
12 An Ah wahn tink deep bowt aala di tingz weh yu du,An tink bowt aala di tingz weh yu don du.
13 Oa Gaad, evriting weh yoo du hoali.
Eni gaad deh weh grayta dan yoo, Oa Gaad?
14 Yoo da di chroo Gaad weh du amayzin tingz.
Yoo shoa yu schrent tu di peepl dehn.
15 Yoo yooz yu powa* fi sayv yu peepl,Weh da Jaykob son dehn ahn Joazef son dehn. (Seela)
16 Di see luk pahn yoo, Oa Gaad;Di see luk pahn yoo ahn staat tu chrimbl.
Ahn di see staat tu geh rof.
17 Waata poar dong fahn di klowd dehn.
Di skai tonda,Ahn yu laitnin flash aal rong laik aro.
18 Di tonda mi song laik di weel fahn wahn chariyat;Laitnin flash ahn lait op di hoal ert;Di ert staat tu chrimbl ahn shayk.
19 Yu mek wahn paat fi yuself chroo di see,Wahn paat fi yuself chroo di deep see,Bot nobadi kuda mi si yu futprint dehn.
20 Yu yooz Moaziz an Ayron fi tek kayr a yu peeplAhn fi leed dehn laik wahn flak.
Futnoat
^ Si di Glasari, “Jedooton.”
^ Er “mi soal.” Si di Glasari, “Soal.”
^ Er “schring myoozik.”
^ Er “laayal lov.” Si di Glasari, “Laayal lov.”
^ Er “han.”
