Saam 8:1-9
Wahn noat fi di dairekta: Yooz di Gitit* choon fi sing dis sang. Dis da Dayvid sang.
8 Oa Jehoava wi Laad, di hoal ert ku si how wandaful yu naym;Yu mek yu gloari reech eevn haiya dan hevn!*
2 Yu shoa yu schrent chroo di tingz weh di lee pikni dehn sehSoh dat yu ku kwaiyet yu enimi dehn weh kruwil ahn weh goh gens yu.
3 Wen Ah luk op tu hevn, Ah si di tingz weh yu mek wid yu han;Ah si di moon ahn di staarz weh yoo mek,
4 Soh da hoo wee soh fi mek yu pay soh moch atenshan tu wi,Ahn da wai yu tek kayr a di son a wahn man?
5 Yu mek ahn wahn lee bit loawa dan di aynjel dehn,Ahn yu put wahn krong a gloari an aana pan ahn.
6 Yu giv ahn kanchroal oava evriting weh yoo mek;Yu put evriting anda ih fut:
7 Aala di flak an aala di kyatl,An eevn aala di wail animal dehn,
8 Di berd dehn weh flai eena di skai ahn di fish dehn weh swim eena di see,An eniting weh di moov eena di see.
9 Oa Jehoava wi Laad, di hoal ert ku si how wandaful yu naym!
