Saam 80:1-19
Wahn noat fi di dairekta: Play dis sang tu di choon a “Di Liliz.” Dis da Aysaf sang weh peepl fi memba.
80 Lisn, Oa Gaad, Izrel Shepad,Di wan weh di leed Joazef disendant dehn jos laik wahn flak.
Di wan weh di sidong pan ih chroan oava* di cherob dehn,Mek yu lait shain.
2 Shoa yu powaFronta Eefrayim, Benjamin, ahn Manaaseh chraib;Kohn sayv wi.
3 Oa Gaad, aksep wi bak;Mek di lait fahn yu fays shain pahn wi, soh dat wi ku geh sayv.
4 Jehoava, di Komanda a di hevnli aamiz, how lang yu wahn kantinyu fi bee beks wen yu peepl dehn pray tu yu?
5 Insteda gi dehn bred, yu mek dehn eet dehn tyaaz,Ahn yu kyaahn eevn konk di amonk a tyaaz weh yu mek dehn jrink.
6 Yoo mek wi nayba dehn kwaaril wid eech ada bikaaz a wi;Wi enimi dehn tek wi mek papishoh weneva dehn feel laik.
7 Oa Gaad, di Komanda a di hevnli aamiz, aksep wi bak;Mek di lait fahn yu fays shain pahn wi, soh dat wi ku geh sayv.
8 Yu bring yu peepl dehn fahn owta Eejip laik how yu wuda root op wahn vain.
Den yu jraiv owt di nayshanz fahn owta dehn lan ahn plaant di vain deh.
9 Yoo pripyaa wahn spat far it,An ih tek root ahn spred aal oava di lan.
10 Di shado fahn di vain dehn kova op di mongtin dehn,An ih branch dehn kova op di seeda chree dehn weh Gaad plaant.
11 Ih branch dehn reech aal di way da di see,An ih smaala branch dehn reech di Yoofraytis Riva.
12 Wai yu nak dong di stoan waal weh deh rong di grayp aachad?
Now evribadi weh paas di pik froot fahn di aachad.
13 Di wail pig dehn fahn di faris kohn dischrai it,Ahn di wail animal dehn kohn eet op di froot.
14 Oa Gaad, di Komanda a di hevnli aamiz, pleez kohn bak ahn help wi.
Wach pahn aal weh di hapm tu wi dong ya!
Tek kayr a dis vain,
15 Di vain* weh yu plaant wid yu rait han.
Luk pahn di branch weh yu mi schrentn soh dat yu ku geh aana.
16 Ih geh bon op ahn dischrai;Yu peepl di ded bikaaz a yu anga.
17 Yooz yu han fi help di man weh deh da yu rait han,Di son a man weh yu mi schrentn soh dat yoo ku geh aana.
18 Den wi noh wahn ton wi bak pahn yu.
Sayv wi, soh dat wi ku aana yu naym.
19 Oa Jehoava, di Komanda a di hevnli aamiz, aksep wi bak;Mek di lait fahn yu fays shain pahn wi, soh dat wi ku geh sayv.
