Saam 85:1-13
Dis da fi di dairekta. Dis da Koara disendant dehn sang.
85 Oa Jehoava, yoo shoa kainis tu di peepl dehn eena yu lan;Di enimi mi kyapcha Jaykob disendant dehn, bot yoo mi bring dehn bak da yu lan.
2 Yu fergiv di mistayk dehn weh yu peepl dehn mek;Yu fergiv aala dehn sin. (Seela)
3 Yoo hoal bak fahn shoa how beks yu beks;Yoo put wahn stap tu yu anga.
4 Oa Gaad, wi sayvya, pleez aksep wi bak,*Ahn stap bee beks wid wi.
5 Yoo wahn stay beks wid wi fareva?
Yoo wahn kantinyu fi bee beks wid evri jenarayshan weh kohn afta wi?
6 Pleez gi wi bak wi enerjiSoh dat yu peepl ku rijais sayka yoo.
7 Shoa wi dat yu lov wi,* Oa Jehoava,Ahn sayv wi.
8 Ai wahn lisn tu weh di chroo Gaad Jehoava seh,Bikaaz hihn wahn anonks tu ih peepl, ih laayal wan dehn, dat dehn wahn soon ga pees,Bot dehn shudn pen pahn dehnself laik weh dehn yoostu du.
9 Gaad redi fi sayv dehn wan weh rispek ahn,Soh dat wi lan ku ful op a ih gloari.
10 Lov* ahn laayalti wahn meet tugeda;Raichosnis ahn pees wahn kis eech ada.
11 Laayalti wahn groa laik lata plaants pahn di ert,Ahn raichosnis wahn shain dong fahn op da hevn.
12 Yes, Jehoava wahn gi wi gud tingz,*Ahn wi lan wahn projoos wahn gud haavis.
13 Raichosnis wahn pripyaa wahn road wid Gaad futstepSoh dat fi hihn peepl ku fala eena it.
Futnoat
^ Er “pleez bring wi bak.”
^ Er “Shoa wi yu laayal lov.” Si di Glasari, “Laayal lov.”
^ Er “Laayal lov.”
^ Er “wahn mek wi praspa.”
