Saam 88:1-18
Dis da Koara disendant dehn sang. Wahn noat fi di dairekta: Play dis sang eena di Mayhalat* stail. Di singaz mos tek tern fi rispan wid sang. Dis da Heeman di Ezrahait Maskil.*
88 Oa Jehoava Gaad, yoo da mi sayvya.
Joorin di day, Ah krai owt tu yoo,Ahn wen nait taim kohn, Ah goh fronta yu fi bayg yu fi help.
2 Alow mi pryaa fi goh op tu yu,Pleez bring yu ayz kloas ahn lisn* tu how Ah di krai owt tu yu fi help.
3 Bikaaz mi laif* ful a sofarin,An Ah deh rait da di ej a di Grayv.*
4 Peepl si mi az sohnbadi weh don deh eena di pit* aredi;Ah noh ga nohmoh schrent.
5 Yu lef mi monks di dedJos laik wahn ded badi weh deh eena wahn grayv;Yu noh memba dehnAhn yu noh protek dehn nohmoh.
6 Yu put mi eena wahn deep pit,Wahn big abis, wehpaat ih reeli daak.
7 Yu anga way mi dong,Di tingz weh yu du da laik sohn big wayv weh di lash gens mi. (Seela)
8 Yu mek mi fren dehn lef mi;Yu mek dehn hayt mi.
Ah feel laik Ah deh eena prizn an Ah kyaahn eskayp.
9 Mi aiy dehn week bikaaz a mi sofarin.
Aal day lang Ah kaal pahn yu, Oa Jehoava;Ah schrech owt mi han tuwaadz yu.
10 Yoo wahn perfaam miraklz fi dehn wan weh ded?
Dehn wan weh ded ku get op ahn prayz yoo? (Seela)
11 Dehn wan weh ded ku taak bowt yu lov* eena di grayv?
Dehn ku taak bowt yu laayalti een deh?*
12 How dehn wan eena di daaknis wahn noa bowt yu miraklz?
Ahn how dehn wan eena di lan a di peepl weh nobadi memba wahn noa bowt yu raichosnis?
13 Bot Ah stil krai owt tu yu fi help, Oa Jehoava,Evri maanin Ah pray tu yu.
14 Oa Jehoava, wai yu di rijek mi?*
Wai yu di haid yu fays fahn mi?
15 Fan Ah yong,Ah di sofa an Ah deh kloas tu det;Ah feel nom fahn aala di sofarin weh yu alow mi fi goh chroo.
16 Bikaaz yu soh beks wid mi, Ah feel week anaal;Di tingz weh yu du fraitn mi.
17 Da laik if dehn serkl rong mi laik waata aal day lang;Dehn sorong mi pahn aal saidz.
18 Yu mek mi frenz ahn mi nayba dehn lef mi;Now da onli daaknis kip mi kompni.
Futnoat
^ Si di Glasari, “Mayhalat.”
^ Si di Glasari, “Maskil.”
^ Er “Pleez ben dong ahn lisn.”
^ Er “soal.” Si di Glasari, “Soal.”
^ Er “Sheeyol,” weh da di Grayv. Si di Glasari, “Grayv.”
^ Er “grayv.”
^ Er “laayal lov.” Si di Glasari, “Laayal lov.”
^ Er “eena Abadon.”
^ Er “mi soal.”
