Saam 91:1-16
91 Enibadi weh di liv eena di seekrit plays a di Moas HaiWahn res eena di shado a di Almaiti.
2 Ah wahn seh tu Jehoava: “Yoo da mai shelta ahn mai sayf plays;Yoo da mai Gaad an Ah put mi chros eena yoo.”
3 Bikaaz Gaad wahn reskyu yu fahn di chrap weh di wan weh kech berd set,Fahn di dizeez dehn weh kaaz sofarin.
4 Yoo wahn tek shelta anda ih wingz,An ih wahn yooz ih feda dehn fi kip yu sayf.
Gaad laayal an ih wahn tek kayr a yu,An ih laayalti wahn bee laik wahn big sheel fi yu ahn wahn schrang waal rong yu.
5 Yu noh wahn frayd fi di terabl tingz weh hapm joorin di nait,Ner di aro dehn weh flai bowt joorin di day.
6 Yu noh wahn frayd fi di siknis weh spred eena di daaknis,Ner di dedli dizeez weh kaaz dischrokshan midl a di day.
7 Wahn towzn peepl wahn jrap ded pahn yu lef han saidAhn ten towzn peepl wahn jrap ded pahn yu rait han said,Bot notn bad wahn hapm tu yoo.
8 Yu wahn onli haftu wach di ponishment weh di wikid wan dehn get.
9 Bikaaz yu mi seh: “Jehoava da mai shelta,”Yu mi mek di Moas Hai bee yu sayf plays;
10 Notn bad wahn hapm tu yu,Ahn notn wikid wahn kohn kloas tu yu tent,
11 Bikaaz hihn wahn koman ih aynjel dehn fi protek yu eniway wehpaat yu goh.
12 Dehn wahn kech yu,Soh dat yu noh eevn nak yu fut gens wahn stoan.
13 Yu wahn stamp op pahn di laiyan ahn di koabra;Yes, yu wahn chrampl op pahn di laiyan ahn di big snayk.
14 Gaad seh: “Bikaaz hihn lov mi, Ah wahn reskyu hihn.
Ah wahn protek hihn bikaaz ih noa mi naym.
15 Wen hihn kaal owt tu mee Ai wahn ansa ahn.
Ah wahn deh bisaid ahn wen ih di goh chroo chroblz.
Ah wahn reskyu hihn ahn giv ahn aana.
16 Ai wahn mek hihn injai wahn lang laif,Ahn hihn wahn si mai salvayshan.”
