Saam 94:1-23
94 Oa Jehoava, di Gaad weh tek rivenj gens di wikid,Mek yu lait shain, ahn ponish di wikid!
2 Get op, Oa Gaad, di Joj oava di hoal ert.
Gi dehn wan weh prowd di ponishment weh dehn dizerv.
3 Fi how lang dis wahn kantinyu soh, Oa Jehoava?
Fi how lang wikid peepl wahn kantinyu rijais?
4 Fahn di way how dehn taak, dehn shoa dat dehn bregin ahn foolish;Dehn wan weh du weh rang laik boas bowt dehnself.
5 Dehn krosh yu peepl, Oa Jehoava;Dehn kruwil tu di peepl weh yoo pik.*
6 Dehn kil di wido ahn farina dehn,Ahn dehn merda di pikni dehn weh noh ga no pa.
7 Dehn seh: “Jah noh di si weh di hapm;Jaykob Gaad noh di pay dis no main.”
8 Unu weh foolish, wen unu wahn geh di sens?
Unu weh noh ga no sens, wen unu wahn staat tu yooz unu hed?
9 Unu noh tink dat di wan weh mek di ayz ku hyaa?
Unu noh tink dat di wan weh mek di aiyz ku si?
10 Unu noh tink dat di wan weh di ponish di nayshan dehn ku disiplin unu tu?
Hihn da di wan weh paas aan nalij tu peepl!
11 Jehoava noa di tingz weh peepl tink bowt;Hihn noa dat di tingz weh peepl tink bowt da jos laik wahn bret.
12 Oa Jah, enibadi weh yu disiplin wahn bee hapi;Enibadi weh yu teech fahn yu laa wahn bee hapi.
13 Dis wahn help ahn fi stay kaam wen ih di goh chroo haad taimz,Til di wikid wan jrap eena wahn pit.
14 Jehoava noh wahn ton ih bak pan ih peepl;Yes, hihn noh wahn abandan dehn.*
15 Bikaaz di joj dehn wahn staat tu mek fyaa disizhanz,Ahn dehn wan weh ga wahn pyoar haat wahn liv akaadn tu dehndeh disizhanz.
16 Hoo wahn fait gens di wikid wan fi mi?
Hoo wahn stan op fi difen mi gens dehn wan weh di du weh rang?
17 If Jehoava neva dehdeh fi help mi,Kwik taim Ah* mi wahn ded.
18 Wen Ah mi seh: “Ah di luk fi slip dong,”Oa Jehoava, yu lov* mi kip di sopoat mi.
19 Wen mi woriz mi feel laik da tu moch fi bayr,Yu komfert mi ahn yu kaam mi dong.*
20 Yoo wuda neva werk langsaid roolaz weh korop,*Bikaaz dehn mek planz fi yooz di laa fi kaaz prablemz.
21 Dehn atak di raichos wan* eena wahn vailent way,Ahn dehn seh dat di inosent wan gilti an ih dizerv fi ded.
22 Bot Jehoava wahn bee wahn sayf shelta fi mi;*Mai Gaad da mai rak weh Ai goh tu fi geh protekshan.
23 Hihn wahn mek di wikid tingz weh dehn du ton rait bak pahn dehn.
Ahn hihn wahn yooz di sayhn wikid tingz weh dehn du fi dischrai dehn.*
Wi Gaad Jehoava wahn kompleetli dischrai dehn.*
Futnoat
^ Er “weh yoo pik az yu inheritans.”
^ Er “abandan di peepl weh hihn pik az ih inheritans.”
^ Er “mi soal.” Si di Glasari, “Soal.”
^ Er “laayal lov.” Si di Glasari, “Laayal lov.”
^ Er “Yu komfertin werdz kaam dong mi soal.”
^ Er “di korop joj dehn.”
^ Er “di raichos wan dehn soal.”
^ Er “wahn hai mongtin fi ron tu.”
^ Er “fi kwaiyet dehn.”
^ Er “wahn kwaiyet dehn.”
