Taitos 2:1-15
2 Bot, yu mos aalwayz teech di chroot.
2 Inkorij di oalda man dehn fi kanchroal dehn habits ahn bee seeryos. Dehn fi bee sensabl ahn ga schrang fayt. Dehn fi shoa lata lov, ahn dehn fi bayr op schrang eena evriting.
3 Saym way soh, tel di oalda uman dehn fi bihayv eena wahn way weh aana Gaad, ahn dehn noh fi taak bad bowt nobadi. Dehn noh fi jrink lata wain, ahn dehn fi teech evriting weh gud.
4 Den di oalda uman dehn wahn ku advaiz* di yonga uman dehn fi lov dehn hozban, fi lov dehn pikni,
5 fi bee sensabl, ahn fi bee kleen eena weh dehn tink ahn du. Dehn fi tek kayr a dehn hows, dehn fi bee gud, ahn dehn fi bee wilin fi obay dehn hozban. If dehn du dehnya ting, den nobadi wahn kyaahn taak bad bowt di werd a Gaad.
6 Saym way soh, kip aan di inkorij di yonga man dehn fi bee sensabl,
7 ahn set wahn gud egzampl eena evriting weh yu du. Yu fi teech weh kleen eena wahn way weh peepl wahn tek it seeryos,
8 ahn taak eena wahn gud way weh nobadi kyaahn kritisaiz. If yu du dat, den peepl weh deh gens di chroot wahn feel shaym, ahn dehn noh wahn ga notn bad fi seh bowt wi.
9 Yu mos tel di slayv dehn fi bee wilin fi obay dehn maasta eena evriting ahn chrai fi pleez dehn. Dehn noh fi bak-chat dehn maasta
10 ner teef fahn dehn. Wahn slayv fi bee di kaina persn weh ih maasta ku chros eena evriting. If dehn du aala dehnya ting, den eena evri way dehn wahn di shoa peepl how byootiful di teechinz a Gaad, wi Sayvya.
11 Di grayt kainis* a Gaad playn fi si bikaaz hihn di bring salvayshan tu aal kaina peepl.
12 Da kainis teech wi fi rijek eniting weh goh gens Gaad wil ahn fi rijek di tingz a di werl weh peepl waahn. Ih teech wi fi liv sensabl, fi bee raichos, ahn fi serv Gaad joorin di taim weh wi di liv eena.
13 Wi fi liv laik dat wail wi di wayt fi wi hapi hoap kohn chroo, ahn fi mek di grayt Gaad, ahn wi Sayvya Jeezas Krais, shoa wi fi dehn gloari.
14 Krais mi giv op ih laif fi set wi free* fahn evriting weh wikid ahn fi kleen wi soh dat wi ku bee fi hihn speshal peepl weh eega fi du gud.
15 Kip di teech dehnya ting, ahn sins yu ga ful atariti fi du it, kip di inkorij ahn karek adaz. Noh mek nobadi luk dong pahn yu.
Futnoat
^ Er “kongsl; chrayn.”
^ Si di Glasari, “Grayt kainis.”
^ Er “pay di ransom prais fi set wi free.”
