Taitos 3:1-15
3 Kantinyu fi rimain di bradaz fi bee wilin fi obay di govament an enibadi els weh ga atariti oava dehn. Dehn shuda bee redi fi du lata gud.
2 Dehn noh fi slanda nobadi, dehn noh fi laik kwaaril, ahn dehn noh fi bee stobant, bot dehn fi aalwayz bee jentl tuwaadz evribadi.
3 Wee neva yoostu bee sensabl needa, ahn wi neva obeedyant, ahn peepl yoostu fool wi op. Wi yoostu bee slayv tu aal kaina dizaiya ahn plezha. Wi yoostu du loan badnis ahn jelos ada peepl. Wi yoostu du disgostin tingz, ahn wi yoostu hayt wan anada.
4 Bot wi Sayvya, Gaad, shoa wi kainis, an ih shoa wi humoch ih lov peepl.
5 Hihn sayv wi bikaaz ih ga mersi pahn wi, noh bikaaz a eni raichos ting weh wee mi du. Hihn wash wi kleen ahn gi wi wahn nyoo laif wen ih gi wi ih hoali spirit.
6 Hihn neva hoal bak notn* wen ih mi poar owt da spirit pahn wi chroo Jeezas Krais wi Sayvya.
7 Soh Gaad aksep wi az raichos bikaaz a ih grayt kainis,* ahn soh wi ku ga di hoap a evalastin laif.
8 Yu ku chros weh Ah di tel yu, an Ah waahn yu kip di teech dehnya ting, soh dat di bradaz weh ga fayt eena Gaad wahn kantinyu fi tink bowt how dehn ku du gud aal di taim. Dehnya da gud ting, ahn peepl wahn benifit if dehn du dehn.
9 Bot noh ga notn fi du wid eni foolish aagyument er eni kwaaril oava wich famili lain peepl kohn fram. Yu noh fi get eena no kwaaril er fait oava di Laa, kaaz dehnya ting noh wert notn, ahn dehn kyaahn help nobadi.
10 If sombadi spred faals teechinz, yu mos waan ahn. Bot if ih noh lisn tu yu afta di sekant waanin, den yu noh fi ga notn fi du wid ahn.
11 Kaaz yoo noa dat da kaina persn ton weh fahn di chroot, an ih di sin, an ih kandem ih oanself.
12 Wen Ah sen Artimas er Tikikos tu yu, yu mos chrai yu bes fi kohn meet mi da Nikopolis, kaaz Ah disaid fi spen di winta deh.
13 Mek shoar dat Zeenas, weh noa di Laa gud, an Apolos get evriting weh dehn need fi dehn chrip.
14 Bot mek wi peepl laan fi kantinyu du gud aal di taim soh dat dehn ku help enibadi weh reeli need help. Den dehn wahn ku du lata gud.*
15 Evribadi weh deh ya wid mee seh fi tel yu heloa. Seh heloa tu di bradaz weh lov wi.
Ah pray dat Gaad shoa unu lata kainis.
